काठमाडौं (हाम्रो खेलकुद)– अखिल नेपाल फुटबल संघ (एन्फा) को आन्तरिक विवाद औपचारिक रुपमै छताछुल्ल भएको छ । माघको २९ गते बसेको कार्यसमितिको बैठकले गरेको विभिन्न निर्णयमा आफ्नो असहमति रहेको भन्दै एन्फा वरिष्ठ उपाध्यक्ष पंकज नेम्बाङले मंगलबार एन्फा महासचिव इन्द्रमान तुलाधरलाई बुझाएका छन् ।

नोट अफ डिसेन्ट लेख्न नमिलेपछि एन्फा अध्यक्ष कर्मा छिरिङ शेर्पा र महासचिव तुलाधरले लिखित असहमति गर्न दिएको सल्लाह अनुसार आफुले पत्र बुझाएको वरिष्ठ उपाध्यक्ष नेम्बाङले जनाएका छन् । उनीसँगै कार्यसमितिका सदस्य दावा लामाले पनि अलग्गै असहमति पत्र बुझाएका छन् ।

२७ नम्बर निर्णय बाहेक उनीहरु दुवैको बेहोरा एकै नास रहेको छ । सदस्य लामाले २७ नम्बरलाई भने आफ्नो असहमतिमा समेटेका छैनन् । झन्डै दुई वर्षअघि शेर्पाको नेतृत्वमा नेम्बाङ सर्वाधिक मतसहित उपाध्यक्षमा निर्वाचित भएका थिए । यस्तै दावा लामा पनि सर्वाधिक मत ल्याएर सदस्यमा निर्वाचित भएका थिए ।

सुरुवातका केहि समय ठिक ठाकैको सम्बन्ध रहेपनि शेर्पा र नेम्बाङबीच पछिल्लो एक वर्षदेखि विवाद बढ्दै गइरहेको थियो । यद्दपी लिखित रुपमै असहमति दर्ता गराएको भनेको यो पहिलो पटक हो ।

पूर्व अध्यक्ष गणेश थापाविरुद्ध आन्दोलनका लागि शेर्पा र नेम्बाङ लामो समय एकसाथ उभिएका थिए । विधि अनुरुप आफुले नोटअफ डिसेन्ट लेख्न नपाएकोले अध्यक्ष र महासचिवकै सल्लाह अनुसार असहमति दर्ता गराएको नेम्बाङले बताए ।

एन्फा वरिष्ठ उपाध्यक्ष नेम्बाङले बुझाएको असहमति पत्र ।