प्रकाश तिमल्सिना,काठमाडौं

राष्ट्रिय फुटबल टोलीका महत्वपर्ण सदस्य मध्ये रोहित चन्द यति बेला चाहेर पनि स्वदेश फर्कन सक्दैनन् । कारण कोरोना भाइरस कोभिड १९ को विश्वव्यापी असरका कारण नेपालमा अन्तर्राष्ट्रिय उडान ठप्प छ । सरकारले चैत १८ गते सम्मका लागि लकडाउनको घोषणा गरिसकेको छ ।

नेपालमा अहिले सम्म ३ जनामा कोरोना पोजेटिभ देखिएको छ । त्यसमध्ये १ जना ठिक भइसकेर घर फर्केका छन् भने २ जना उपचार गराइसकेका छन् । तर, रोहित बस्दै आएको इन्डोनेसियामा कारोनाको ठूलो असर परिसक्दा पनि लकडाउन गरेको छैन । त्यहाँ कोरोनाबाट अहिले सम्म ८ सय ९३ मा संक्रमण देखिएको छ भने ७८ जनाको ज्यान गइसकेको छ ।

फुटबलका गतिविधि भने सबै ठप्प छ । नयाँ सिजन सुरु भइसकेको अवस्थामा कोराना कारण विश्वभर नै खेलकुद प्रभावित भएको छ । तर, थप कुनै जानकारी नआएकोले अलमलमा परेर बसेको बताउँछन्, रोहित । रोहित पर्सिजा जाकार्तामा आबद्ध छन् । उनी लामो समयदेखि सोही क्लबमा छन् । दुई वर्षअघि टोली लिग वानको च्याम्पियन हुँदा उनी लिगकै सर्वोत्कृष्ट खेलाडी पनि बनेका थिए । जाकार्तामा जनसंख्याको चाप अध्याधिक हुँदा पनि त्यहाँ लकडाउन नगरिएकोमा भने रोहित पनि आश्चार्यमा परेको सुनाउँछन् ।

रोहितले आफ्नो अनुभव र दैनिकी बारे हाम्रो खेलकुदसँग यसरी साटे :

इन्डोनेसिया प्रभावित देशमा पर्दछ । हरेक दिन संक्रमितहरुको संख्या बढीरहेको समाचार हुन्छ । पहिला भन्दा यातायातका साधानको चाप कम भएपनि जाकार्ता यसै पनि भिडभाड हुने स्थान हो । यहाँको सरकारले किन अहिले सम्म लकडाउन नगरेको मैले बुझ्न सकेको छैन । यहाँ मान्छेको आवात जावत उस्तै छ । कार्यालयहरु चलेकै छन् ।

कोरोनाकै कारण यहाँको फुटबल भने स्थगित भइसकेको छ । त्यसपछि थप कुनै जानकारी आएको छैन । कहिलेसम्म स्थगित भन्ने प्रष्ट नभएकाले स्वदेश फर्कने योजना सुरुमा बनाइन । अब अहिले त हाम्रो देशमा लकडाउनको अवस्था छ,अन्तर्राष्ट्रिय उडान बन्द छ । क्लबका इटाली, क्रोएसिया र नेदरल्यान्ड्सका खेलाडी पनि छन् । उनीहरु पनि स्वदेश फर्केका छैनन् ।

हाम्रो क्लबको नियमित प्रशिक्षण पनि रोकिएको छ । म बस्ने ठाँउबाट क्लबमा जान बाइकमा २० मिनेट जति लाग्छ । दिउँसो ३ बजे क्लब गएर साँझ ७ बजे तिर फर्कन्छु । म अहिले पनि हरेक दिन एक्लै अभ्यास गरिरहेको छु । क्लबको फिजियो पनि नियमित आउँछन् । उनीसँग सल्लाह लिदै आफ्नो अभ्यास गर्छु ।

अस्ति एक दिन मेसिनले घाँस पनि काटे । मैले त्यसरी घाँस कहिल्यै काटेको थिइन् । रमाइलो लाग्यो । नियमित अभ्यास भन्दा फरक भएकाले घाँस काट्दा नयाँ अनुभव भयो । अब भोलीबाट भने म पनि अभ्यास नगई घरमै जे जस्तो सम्भव हुन्छ अभ्यास गर्ने विचारमा छु । संक्रमण फैलिदै गएकोले अब बाहिर निस्कनु त्यति सुरक्षित हुँदैन । कोरानो असर अघिसम्म म बाहिरबाट खाना मगाएर खान्थे । अहिले आफै पकाएर खाने गरेको छु ।

हाम्रो राष्ट्रिय टोलीका सबै खेलाडी आफ्नो फिटनेसलाई लिएर गम्भिर नै छन् । समयलाई पनि हामीले विचार गर्नै पर्छ । यो समय बाहिर गएर अभ्यास गर्ने अवस्था छैन । अब घरमा जे जस्तो सम्भव छ । त्यहि गर्नु उपयुक्त हुन्छ । जुन सुकै खेलका खेलाडीका लागि पनि अभ्यास गर्नै पर्ने हुन्छ । यस्तो समयमा घरमा बसेर गर्न सकिने अभ्यास गर्न सकिन्छ । इन्टरनेटमा हेरर पनि गर्न सकिन्छ । यो अवस्था कहिलेसम्म लम्बिने कुनै यकिन नभएकाले हामीले आफ्नो दैनिकीलाई पनि ख्याल गर्नुपर्ने हुन्छ । अझै हामी खेलाडीले खानपान र व्यायममा त ध्यान दिनै पर्छ ।

म हाम्रो देशमा के भइरहेको छ सबै समाचार हेरिरहेको हुन्छु । अहिले त पहिला भन्दा झन बढी समाचार हेर्छु । संक्रमण फैलन नदिनका लागि सरकारले लकडाउन गरेको छ । यो सकारात्मक कदम हो । अहिलेका लागि यो भन्दा उपयुक्त अर्को विकल्प देखिएको छैन । अब अर्को चुनौतीपूर्ण अवस्था भनेको न्यून आय भएकाहरुका लागि यो निकै कठिन समय हो । त्यस्तो आर्थिक अवस्था कमजोर भएकाहरुका लागि सरकारले केहि प्याकेज ल्याउनुपर्दछ । अन्यका हकमा भने रासन, पानी, ग्यासलगायत अति आवश्यक सामाग्री सहज उपलब्ध हुने व्यवस्था गर्नुपर्ने हुन्छ । यो अवस्था लामो समय सम्म जाने अवस्थामा के गर्ने भन्नेमा पनि सरकारले अहिले सोच्नु पर्ने अवस्था आएको छ ।

कोराना भाइरसका कारण अहिले विश्व नै संकटमा परेको छ । यस्तो अवस्थामा हामीले धर्यता गुमाउनु हुँदैन । आत्तिएर पनि हुन्दैन । सरकारले हाम्रो लागि गरेको निर्णयको पालन गर्नुपर्दछ । विश्व स्वास्थ्य संगठनले दिएका सुझावलाई पालना गर्नु अहिले हाम्रा लागि उपयुक्त हुन्छ । हरेकका जीवनमा कठिन परिस्थिति आउँछ ।

अहिले संसारभरका मानिसहरुलाई एकै पटक समस्याले घेरेको छ । यति बेला हामीले आफ्नो र अरुको स्वस्थ्यलाई पनि ख्यालमा राख्नुपर्दछ । हामीले सबै खाले कठिन समयको पनि सामना गर्नुपर्ने हुन्छ । आशा गरौं केहि समयमा हामी पुरानै अवस्थामा फर्कन सक्नेछौ । त्यसका लागि हामीले सरकारको आलोचना मात्र होइन, आफ्नो जिम्मेवारी पनि पुरा गरौं ।

रोहितको एकल प्रशिक्षणको भिडियो :