एजेन्सी – युरोपियन फुटबलको सर्वाेच्च निकाय (युइएफए) ले यो सिजनको बाँकी रहेको युइएफए च्याम्पियन्स लिग र युरोपा लिग अनिश्चित कालका लागि स्थगित गरेको छ । 

युइएफएको ५५ सदस्यीय राष्ट्रको प्रतिनिधिको बुधबार बसेको भिडियो कन्फ्रेस बैठकले यो सिजनको च्याम्पियन्स लिग र युरोपा लिग अनिश्चित कालका लागि स्थगित गर्ने निर्णय गरेको हो । यस्तै युइएफएले जुनसम्मको सबै अन्तर्राष्ट्रिय खेल पनि स्थगित गरेको जनाएको छ ।

यससँगै विश्व फुटबलको अर्काे सिजनको क्यालेन्डरलाई असर गर्ने पक्का भएको छ । यूईएफएले जुनमा युरोकपको प्ले अफ खेलहरु हुन तालिका बनाएको थियो ।

प्रिमियर लिग ३० अप्रिलसम्म स्थगित छ । प्रिमियर लिगका म्यानचेस्टर सिटी र चेल्सी च्याम्पियन्स लिगमा रहँदा म्यानचेस्टर युनाइटेड र वल्भ्स र स्कटिस प्रिमियर लिगको रेन्जर्स युरोपा लिगमा रहेको छ । यस्तै च्याम्पियन्स लिग, युरोपा लिगा र वुमन्स च्याम्पियनेको फाइनल पनि अनिश्चित कालको लागि सरेको छ ।

मे महिनालाई फाइनल खेलहरू हुने तय भएको थियो । युरोपका लिगहरु रद्ध गर्ने कि सुचारु गर्ने भन्ने विषयमा निर्णय हुन सकेको छैन । युइएफएका अध्यक्ष एलेक्सन्दर सेफरिनले एक साताअघि जुन महिनासम्म पनि सिजन शुरुवात हुन नसकेको अवस्थामा सिजन अन्त्य गरिने बताएका थिए ।