एजेन्सी – इटालियन सिरी ‘ए’ क्लब किएभोका पुर्व गोलरक्षक स्टेफानो सोरेन्टिनोले पेनाल्टी बचाएपछि पोर्चुगल तथा युभेन्टसका स्टार फरवार्ड क्रिस्टियानो रोनाल्डो एकदमै रिसाएको खुलासा गरेका छन् ।

रोनाल्डो र सोरेन्टिनोबीच गत सिजनमा पहिलोपटक भेट भएको थियो । २१ जनवरी २०१९ मा घरेलु मैदानमा युभेन्टसले किएभोमाथि ३–० को जित निकालेपनि रोनाल्डोले पेनाल्टी चुकाएका थिए । उनको पेनाल्टी सोरेन्टिनोले बचाएका थिए ।

‘उहाँ (रोनाल्डो) एकदमै रिसाए । उनीसँग खेलअघिको ह्यान्डसेकमा जर्सी साटासाट गर्न सहमत भएको थियो । तर, मैले उनको पेनाल्टी बचाएपछि उनी खेलभर नै रिसाए । खेल सकिएपछि ड्रेसिङ रुममा भेट भएको थियो,’ सोरेन्टिनोले एक वर्षअघिको घट्नाको खुलासा गर्दै भने ।

‘उनले मलाई एक हात दिए र मलाई बधाई दिए । तर, उनमा अझै रिस मरेको थिएन । मैले इटालीमा यस्तो घट्ना कहिल्यै भोगेको थिएन । उनले मलाई जर्सी पनि दिएनन् । त्यसपछि युभेन्टसका अर्का खेलाडी पाउलो डिबालाको जर्सी लिएँ । जे भयो राम्रो भयो ।’

‘उनले आफ्नो जर्सी बदल्न सहमत भएको र मैले पेनाल्टी बचाएपछि यो सबै परिवर्तन भयो । उनले मलाई खेलभर नै बेवास्ता गरे।’ खेलमा डगलस कोस्टा, इम्री क्यान र ड्यानियल रुगानीले गोल गरेपनि रोनाल्डो पेनाल्टीमा चुकेका थिए ।

युभेन्टसले २–० ले अग्रता लिएको अवस्थामा दोस्रो हाफमा युभेन्टसले पेनाल्टी पाएको थियो । जसमा रोनाल्डो चुकेका थिए । ४१ वर्षीय भेट्रान गोलरक्षक सोरेन्टिनो संन्यास लिएर अहिले इटालीको आठौं डिभिजनको क्लब सेर्भाेबाट फरवार्डको रुपमा खेलिरहेका छन् ।