एजेन्सी – कोरोना भाइरस (कोभिड-१९) को प्रकोपका कारण विश्व फुटबलको सर्वोच्च निकाय फिफाले सार्वजनिक गरेको विश्व वरीयता स्थिर बन्न पुगेको छ ।

मार्च महिनामा फिफाको अन्तर्राष्ट्रिय खेलहरु हुने विन्डो भएपनि कोरोनाका कारण सम्पूर्ण खेलहरु रद्द हुन पुगेको थियो । नेपालले पनि विश्वकप छनोट अन्तर्गत घरेलु मैदानमा दुई खेल खेल्ने कार्यक्रम रहेको थियो । तर कोरोनाले गर्दा विश्वकप छनोटका खेलसँगै सम्भावित अन्तर्राष्ट्रिय मैत्रीपूर्ण खेलहरु पनि स्थगित हुन पुग्यो ।

फिफाले बिहिबार सार्वजनिक गरेको वरीयतामा अघिल्लो महिनाको तुलनामा जम्मा ४ खेल सम्भव भए । त्यसले गर्दा वरीयताको तल्लो क्रममा रहेका दुई टोलीको मात्र वरीयता परिवर्तन भएको हो । दक्षिण सुडानको वरियता १ सय ६८ स्थानमा पुगेको छ । बर्मुडाले जमैकासँग २-० को हार बेहोरेपछि सुडान र जमैका एकै स्थानमा रहेका हुन् ।

नेपाल विश्व वरीयताको १ सय ७० औं स्थानमा छ । दक्षिण एसियाली राष्ट्रमा भारत १ सय ८ स्थानमा रहँदा माल्दिभ्स १ सय ५५ औं स्थानमा छ । नेपालभन्दा पछाडी बंगलादेश १ सय ८७, भुटान १ सय ८९, पाकिस्तान २ सय र श्रीलंका २ सय ६ औं स्थानमा रहेका छन् । एसियाली राष्ट्रमध्य शीर्षस्थानको जापान विश्व वरीयतामा २८ औं स्थानमा छ ।

विश्व वरीयतामा बेल्जियमले नै शीर्षस्थान ओगटेको छ । दोस्रो स्थानमा फ्रान्स र तेस्रोमा ब्राजिल रहेका छन् । त्यसपछि इंग्ल्यान्ड र उरुग्वेले क्रमश: शीर्ष ५ स्थान ओगटेका छन् । शीर्ष १० स्थानमा क्रोएसिया, पोर्चुगल, स्पेन, अर्जेन्टिना र कोलोम्बिया रहेका छन् ।