एजेन्सी – पोर्चुगिज राष्ट्रिय फुटबल टोली तथा इटालियन च्याम्पियन युभेन्टसका स्टार फरवार्ड क्रिस्टियानो रोनाल्डो आधुनिक फुटबलका उत्कृष्ट खेलाडी मध्य एक हुन् । पछिल्लो एक दशकको व्यक्तिगत प्रदर्शन हेर्ने हो भने विश्व फुटबल यिनै रोनाल्डो र अर्जेन्टिनी तथा स्पेनिस क्लब बार्सिलोनाका लियोनेल मेस्सीको वरपर घुमिरहेको छ ।

रोनाल्डो र मेस्सीबीच को उत्कृष्ट भन्ने बहस विश्व फुटबलमा चलिरहेको छ । हुन पनि यि दुई खेलाडीले पछिल्लो एक दशकका १२ मध्ये ११ बालोन डिओरको अवार्ड जितेर यसलाई प्रमाणित गरिसकेका छन् । यसबीचमा एक संस्करण क्रोएसिया तथा स्पेनिस क्लब रियल म्याड्रिडका लुका मोड्रिचले जितेका थिए । यसले गर्दा पनि को उत्कृष्ट भन्नेमा फुटबल पण्डित र समर्थहरुको मत बाँझिनु स्वभाविक नै हो ।

रोनाल्डो (३५ वर्ष) र मेस्सी (३२ वर्ष)नै आफ्नो खेल जीवनको उत्तरार्द्धमा छन् । तर, पनि यिनीहरुको प्रदर्शनमा केही कमी आएको छैन । यि दुई खेलाडीले आफ्नो झन्डै दुई दशकको फुटबल करियरमा नजितेको र कीर्तिमान नबनाएको केही बाँकी छैन ।

हामी यहाँ आज रोनाल्डोको बारेमा चर्चा गर्दैछौ । ५ पटकको बालोन डि ओर विजेता रोनाल्डो पोर्चुगल र स्पेनिस क्लब रियलको सर्वाधिक गोलकर्ता हुन् । उनी युरोपियन क्लब फुटबलको सबैभन्दा ठुलो प्रतियोगिता युइएफए च्याम्पियन्स लिगको सर्वाधिक गोलकर्तासमेत हुन् । उमेर ३५ वर्ष रहेपनि उनीमा अझैपनि युवा खेलाडीमा जस्तै जोश छ । उनले क्लब र राष्ट्रका लागि लगातार उच्च प्रदर्शन गरिरहेका छन् ।

यहाँ रोनाल्डोको २० कीर्तिमानलाई उल्लेख गरिएको छ ।

– युइएफए प्रतियोगितामा सर्वाधिक गोल – १३१

– युइएफए च्याम्पियन्स लिगमा सर्वाधिक गोल – १२९

– युइएफए च्याम्पियन्स लिगको एक सिजनमा सर्वाधिक गोल – १७ (२०१३/०१४)

– युइएफए च्याम्पियन्स लिग फाइनलमा सर्वाधिक जित – ५ पटक (एकपटक म्यानचेस्टर युनाइटेड र चारपटक रियल म्याड्रिडबाट)

– च्याम्पियन्स लिगको फाइनलमा लगातार तीन सिजन गोल गर्ने एक्ला खेलाडी

– च्याम्पियन्स लिगको समूह चरणका सबै ६ खेलमा गोल गर्ने एक्ला खेलाडी

– च्याम्पियन्स लिगमा लगातार ११ खेलमा गोल गर्ने एक्ला खेलाडी

– च्याम्पियन्स लिगमा एकै क्लब (युभेन्टस) विरुद्ध सर्वाधिक गोल गर्ने खेलाडी (१० गोल)

– स्पेनिस क्लब रियल म्याड्रिडका सर्वाधिक गोलकर्ता (४३८ खेल– ४५० गोल)

– सर्वाधिक युइएफए क्लब फुटबलर, बेस्ट प्लेयर र मेन्स प्लेयर जित्ने खेलाडी – ४ पटक

– सर्वाधिक पटक युइएफए टिम अफ दि इयरमा पर्न सफल – १४ पटक

– युरोकपमा सर्वाधिक खेल खेल्ने खेलाडी – २१ खेल

– युरो र विश्वकप सर्वाधिक खेल खेल्ने कीर्तिमान –३८ खेल (जर्मनीका बास्टियन स्वान्सटाइगरसँग बराबरी)

– युरोकपमा सर्वाधिक गोल गर्ने खेलाडी – ९ गोल (फ्रान्सका मिचेल प्लाटिनीसँग बराबरी)

– युरोकपको चारै संस्करणमा गोल गर्ने खेलाडी (४ युरोकप)

– युरोकपका दुई संस्करणमा तीन भन्दा बढी गोल गर्ने एक्लो खेलाडी (२०१२ र २०१६)

– युरो कपमा (छनोटसहित) सर्वाधिक गोल गर्ने खेलाडी – ४० गोल

– युरो र युरोपियन विश्वकप छनोटमा सर्वाधिक गोल गर्ने खेलाडी – ६१ गोल

– युरोपको सर्वाधिक गोलकर्ता (९९ गोल) विश्वमा दोस्रो स्थानमा इरानका अली दाई (१०९) भन्दा पछि