एजेन्सी – रियल म्याड्रिडका विंगर ग्यारेथ बेलले सन् २०१४ को कोपा डेल रे फाइनलमा बार्सिलोनाविरुद्ध विजयी गोल गरेको क्षण कमैले बिर्सन सक्छन् । त्यो गोलले रियल च्याम्पियन मात्र बनेको थिएन, डिफेन्डर मार्क बार्टराको करीअरमा निर्णायक मोड पनि बन्न पुग्यो ।

उक्त गोलको मदतले रियल म्याड्रिडले उपाधि जितेको थियो भने अघिल्लो सिजन रियल आएका बेलले क्लबका समर्थकमाझ आफूलाई सानदार रुपमा प्रस्तुत गरेका थिए । खेलको ८५ औं मिनेटमा मिडफिल्डमा बल अगाडी बढाएका उनलाई बार्सिलोनाका डिफेन्डर मार्क बार्टराले रियलको बेन्चअगाडी ज्यानले पेले । रियलका प्रशिक्षक कार्लो एन्चेलोटि फल माग्दै थिए तर बेलले बल लखेट्न छाडेनन् । उनले द्रुत गतिमा बार्टराभन्दा अगाडी पुगेर बललाई नियन्त्रणमा लिए र अगाडी बढाउँदै गोल नै गरे ।

उक्त खेलमा रियलका सुपरस्टार फरवार्ड क्रिस्टियानो रोनाल्डो चोटका कारण उपस्थित थिएनन् । रोनाल्डोको अनुपस्थितिमा बेलले उत्कृष्ट गोल गर्दै उपाधि दिलाए । त्यसअघि रियलले एन्जल डी मारियाको गोलले अग्रता लिएपनि बार्टराले गोल गर्दै खेल बराबरीमा ल्याएका थिए । त्यसबेला बार्टरा बार्सिलोनाको सिनियर टोलीमा जम्दै गरेका थिए । उनको खेल हेर्न राष्ट्रिय टोलीका प्रशिक्षक भिसेन्टे डेल बोसके समेत दर्शकदिर्घामा थिए ।

त्यसबेला २३ वर्षको उमेर रहेका बार्टरा लगातार पहिलो रोजाईमा परेका थिए । उनलाई बार्सिलोनाको डिफेन्सको भविष्य समेत आंकलन गरिएको थियो । तर त्यसपछि लगातार खस्कँदो प्रदर्शन गरेपछि उनी अर्को सिजन पनि उठ्न सकेनन् । २०१६ मा उनी जर्मन क्लब बोरुसिया डर्टमुन्ड पुगे । त्यहाँ दुई सिजन बसेपछि सन् २०१८ मा उनी रियल बेटिस आइपुगे ।

बार्टराले केहि दिनअघि मात्र प्रत्यक्ष अन्तवार्तामा रियल म्याड्रिडका त्यसबेलाका गोलरक्षक इकार कासिलाससँग आफ्नो अनुभव साटे । ‘त्यो समय मेरो लागि निकै कठिन रहयो । म बार्सिलोनामा युवा खेलाडीको रुपमा रियल म्याड्रिडविरुद्ध खेलिरहेको थिएँ । राम्रो खेल्ने मात्र होइन, इकार कासिलासविरुद्ध गोल समेत गरेको थिएँ । उत्कर्षमा पुगेको उक्त समय केहि मिनेटमा नै म कहाँ पुगे । त्यो क्षणले नै मेरो करीअरमा निर्णायक भूमिका खेल्यो,’ उनले भने ।

उक्त गोलको भिडियो :