एजेन्सी – साउदी अरेबियाको सार्वभौम धन कोषले इंग्लिस प्रिमियर लिगको न्युकासल युनाइटेड खरिद गर्ने प्रक्रिया रोक्न प्रिमियर लिगमाथि दबाब बढेको छ ।

साउदीको कोषले ३ सय मिलियन पाउण्डमा न्युकसलको स्वामित्व खरिद गर्न क्लबका मालिक माइक एस्लीसँग सम्झौता गरिसकेको छ । यसअघि टोलीका मालिक रहेका एस्लीले क्लबलाई राम्रोसँग सम्हालन नसकेको आरोप समर्थकबाट लाग्दै आएको थियो । साउदीको लगानीसँगै अब ट्रान्सफर बजारमा न्युकासल आक्रामक रुपमा आउने अपेक्षा गरिएपनि त्यसले केहि समय कुर्नुपर्ने देखिन्छ ।

साउदीले खरिद गर्ने प्रक्रिया अगाडी बढाएसँगै प्रिमियर लिगले स्वीकृति दिन बाँकी छ । लिगले अब कागजात अध्ययन गरेर क्लबका नयाँ मालिक र निर्देशन बोर्डसँग छलफल गरेपछि मात्र स्वीकृति प्रदान गर्ने नगर्ने निर्णय हुनेछ । तर साउदीको प्रयास सफल हुन नदिन प्रिमियर लिगलाई दुई संस्थाबाट दवाव आएको छ ।

टेलिभिजन कम्पनि बिइन स्पोर्ट्स र एम्नेस्टी इन्टरनेसनलले प्रिमियर लिगलाई साउदीको खरिद प्रक्रियालाई स्वीकृति नदिन चेतावनी दिएका छन् । कतारमा रहेको बिइन स्पोर्ट्स प्रिमियर लिगको विदेशी टेलिभिजनमा लिग प्रसारण गर्ने आधिकारिक संस्था हो । कतार र साउदीबीच पछिल्लो समय कुटनीतिक सम्बन्धमा समस्या हुँदा पनि लिगलाई दबाब परेको हो ।

पछिल्लो तीन वर्ष साउदीमा बिटोक नामक च्यानलले अनाधिकृत रुपमा प्रिमियर लिग प्रसारण गरेपछि साउदी र बिइन स्पोर्ट्सबीच तिक्तता आएको हो । साउदीले यस विषयमा आवश्यक कारवाही नगर्दा बिइन रुष्ट देखिएको छ । बिइनले मध्यपूर्वी राष्ट्रमा प्रिमियर लिग देखाउने अधिकारी खरिद गरेवापत मोटो रकम तिर्दै आएकोमा बिटोकले विना कुनै शुल्क प्रसारण गरेको थियो ।

बिइनले प्रिमियर लिगका सबै क्लबलाई पनि पत्राचार गर्दै प्रिमियर लिग समक्ष यसको विरोध गर्न आग्रह गरेको छ । बिइनले प्रिमियर लिगलाई प्रसारण अधिकार खरिद गरेवापत ३ वर्षको ४ सय मिलियन पाउण्ड तिर्दै आएको छ । प्रसारण अधिकार रकम नै लिग र क्लबहरुको आम्दानी मुख्य स्रोत रहेकाले प्रिमियर लिगले यसबारे गम्भीर भएर सोच्नुपर्ने देखिन्छ ।

यस्तै मानव अधिकारसम्बन्धि अभियानकर्ता एम्नेस्टी इन्टरनेसनलले पनि प्रिमियर लिग क्लबमा साउदी अरबयाको लगानी गर्न दिन नहुने अडान राखेको छ । एम्नेस्टीले लामो समयदेखि साउदी अरबमा मानवअधिकार हनन भएको, महिला अधिकारसम्बन्धि समस्या रहेको, तेस्रो लिंगीको अधिकार सँगै वाक स्वतन्त्रता नभएको भन्दै विरोध जनाउँदै आएको छ । प्रिमियर लिगले यस्तो संस्थासँग जोडिन नहुने एम्नेस्टीको अडान छ ।

साउदीलाई पछिल्लो समय ‘स्पोर्ट्सवासिङ’ गरेको आरोप लाग्दै आएको छ । स्पोर्ट्सवासिङ भन्नाले कुनैपनि संस्थाले खेलकुदको प्रतियोगिता अथवा टोली खरिद गरेर आफ्नो अन्तर्राष्ट्रिय प्रतिष्ठा बढाउन खोज्नु हो । यद्यपि साउदीका राजकुमार अब्दुलअजिज बिन तुर्की अल फैसलले यस आरोपको खण्डन गरेका छन् ।

‘ हामी खेलकुदमा आबद्ध हुन चाहन्छौं । सन् २०१५ मा जम्मा १३ प्रतिशत साउदीका जनताले प्रति साता आधा घण्टा खेलकुदमा बिताएको देखियो । हामी सन् २०३० सम्म यसलाई ४० प्रतिशत पुर्याउन चाहन्छौं,’ उनले भने ।

यसअघि म्यानचेस्टर सिटीमा आबुधावीका शेख मन्सुरले लगानी गरेपछि क्लबको मुहार नै फेरिएको थियो । त्यसबेला पनि सिटीको खरिद प्रक्रियालाई लिएर निकै आलोचना भएको थियो । न्युकासलको हकमा पनि खरिद प्रक्रियामा प्रिमियर लिगले स्वीकृत गर्ने सम्भावना बलियो छ । दुवै पक्षबाट कागजी प्रक्रिया सकिएको र खरिद रकम समेत चुक्ता भइसकेको छ ।

अब प्रिमियर लिगले सम्पूर्ण प्रक्रिया अध्ययन गरेर केहि साताभित्र औपचारिक निर्णय गर्ने बुझिएको छ । साउदीले क्लबको ८० प्रतिशत स्वामित्व खरिद गर्न लागेको हो । बाँकी २० प्रतिशत भने आमान्डा स्टेभेली र रुबेन परिवारको नाममा रहेको छ । साउदीको खरिद प्रक्रिया स्वीकृत भएपछि यासिर अल रुमाएन क्लबको नयाँ अध्यक्ष बन्नेछन् ।

रुमाएन साउदी अरबको नागरिक लगानी कोषका गभर्नर हुन् । उनी विश्वकै सबैभन्दा ठूलो तेल कम्पनि साउदी आराम्कोका अध्यक्ष समेत हुन् । उनी विश्व प्रतिष्ठित ट्याक्सी सेवा प्रदायक उबरको पनि बोर्डमा छन् । उनलाई साउदीका राजकुमार मोहमद बिन सलमानको साथ रहेको छ ।

कोरोना महामारीका कारण एस्लीले न्युकासल बेच्ने प्रक्रियामा केहि लचकता अपनाएका थिए । उनले आफूले तोकेको मुल्यभन्दा ४० मिलियन पाउण्ड कममै क्लब हस्तान्तरण गरे । साउदीले प्रिमियर लिगमा बुझाएको कागजातमा च्याम्पियन्स लिगमा खेल्ने देखि नयाँ विज्ञापन स्रोत जम्मा गर्ने बताएको छ ।