एजेन्सी – जर्मन क्लब बोरुसिया डर्टमुन्डका युवा फरवार्ड एर्लीङ हालान्डले पेरिस सेन्ट जर्मेन (पिएसजी) का स्टार फरवार्ड नेयमारलाई च्याम्पियन्स लिगका दौरान गरेको सेलिब्रेसनका लागि धन्यवाद दिएका छन् ।

च्याम्पियन्स लिगको राउन्ड अफ १६ अन्तर्गत दोस्रो लेगको खेलमा नेयमारले गोल गरेपछि र खेल सकिएपछि ड्रेसिङ रुममा पनि हालान्डले गर्दै आएको ध्यान गर्ने सेलिब्रेसन गरेका थिए । त्यसबेला युवा फरवार्ड हालान्डलाई चिढाएको भन्दै सामाजिक संजालमा नेयमार र पिएसजीका खेलाडीको निकै आलोचना समेत भएको थियो । तर हालान्डले भने उक्त सेलिब्रेसन गरेकोमा धन्यवाद प्रकट गरे ।

‘ मलाई लाग्छ त्यो सेलिब्रेसनले विश्वमाझ ध्यान गर्नुको महत्त्व देखाएको छ । हामी खेलाडीले पनि नियमित ध्यान गर्दा मानसिक रुपमा सहयोग पुग्छ । मेरो लक्ष्य पनि यहि थियो र पिएसजीका खेलाडीले पनि त्यो सेलिब्रेसन गर्दै यसलाई सहयोग पुर्याएका छन् । मलाई सहयोग गरेकोमा धन्यवाद भन्न चाहन्छु,’ हालान्डले भने ।

हालान्डले कुराकानीकै क्रममा आफूले क्रिस्टियानो रोनाल्डोलाई आदर्श मान्दै करीअरमा अगाडी बढेको बताए । ‘ रोनाल्डोलाई हेर्दा नै लाग्छ उनी विशेष छन् । उनले आज गोल गर्छु भन्ने इख लिएर खेल्छन् र गोल गर्छन पनि,’ उनले भने, ‘ मलाई त्यहि विशेषता मनपर्छ । उनको लगाव र गोल गर्ने भोकले नै सफलता हासिल गर्न थप मदत पुग्छ ।’