एजेन्सी – कीर्तिमानी रकममा यसै सिजनको सुरुवातमा एटलेटिको म्याड्रिड पुगेका पोर्चुगलका युवा फरवार्ड जोआओ फेलिक्सले आफूभन्दा भाइ ह्युगो फेलिक्स विशेष खेलाडी रहेको बताएका छन् ।

पोर्चुगलको बेन्फिकाबाट १ सय २६ मिलियन युरोमा म्याड्रिड आएका जोआओले गत सिजन पोर्चुगिज लिगको उपाधि जित्दा उत्कृष्ट प्रदर्शन गरेका थिए । २० वर्षका जोआओले पोर्चुगलको राष्ट्रिय टोलीबाट समेत नियमित खेल्दै आएका छन् । तर उनी आफैं भने उनको १६ वर्षीय भाइ ह्युगो फेलिक्स आफूभन्दा विशेष प्रतिभा रहेको दावी गर्छन् । ह्युगो हाल बेन्फिकाको एकेडेमीमा प्रशिक्षणरत छन् ।

‘यदि ह्युगोले उनलाई सहयोग गर्न चाहनेहरुलाई राम्रोसँग सुन्छन् भने उनी सफल हुनेछन्,’ जोआओले बीटिभीलाई भने, ‘ उनी अहिले जे गर्छन् म त्यो उमेरमा गर्न सक्दिनथिएँ । उनको अहिलेको स्तरले नै उनलाई सिनियर टिममा खेल्न सक्छन् । उनले जति मिहिनेत गर्छन्, उमेरको हिसाबले त्यो धेरै हो’

‘हामी दुवैलाई गोल गर्न मनपर्छ । उनले मभन्दा राम्रो फ्रिकिक प्रहार गर्छन् । पेनाल्टीमा म राम्रो छु । हामी लगभग उस्तै पोजिसनमा खेल्न रुचाउँछौं,’ जोआओले थपे, ‘ फुटबलमा तपाईंले सरल खेल्नुपर्छ तर हामी केहि फरक गर्न खोज्छौं जसले समर्थकलाई उत्साह दिन्छ । हाम्रो खेल्ने शैलीमा समानता भने छ ।’

जोआओ र एटलेटिको म्याड्रिडले च्याम्पियन्स लिगको क्वाटरफाइनलमा स्थान पक्का गरिसकेको छ । लिभरपुललाई अतिरिक्त समयमा हराउँदै अर्को चरण पुगेपछि आशा पनि बढेको छ । फेलिक्स आफू भने च्याम्पियन्स लिग जित्नका लागि मिहिनेतसँगै भाग्यको पनि महत्त्व रहने बताउँछन् ।

‘ च्याम्पियन्स लिग जित्न भाग्यको साथ पनि हुनुपर्छ । यदि हामीले जित्यौं भने करीअर र जीवनमा नै राम्रो क्षण हुनेछ,’ उनले भने, ‘ मैले फुटबल खेल्न थालेदेखि नै च्याम्पियन्स लिग जित्ने सपना देखेको छु । हामीले जित्यौं भने त्यो मेरो लागि जिन्दगिकै सबैभन्दा खुसीको दिन हुनेछ ।’