एजेन्सी – ब्राजिली युवा प्रतिभा रेनिएर जेससले स्पेनिस महारथी रियल म्याड्रिडको पहिलो रोजाईको टोलीमा पहिलोपटक प्रशिक्षण गर्ने मौका पाएका छन् ।

रेनिएर बुधबारदेखि रियलको पहिलो रोजाईको टोलीको प्रशिक्षणमा जोडिएका हुन् । रियलले बुधबारदेखि नै १४ जनाको समुहमा प्रशिक्षण थालेको छ । रेनिएरसँगै अर्का दुई युवा स्टार मिगुइल गुटेरेज र जाभी हर्नान्डेज पनि रियलको प्रशिक्षणमा जोडिएका छन् । यिनीहरुले दुई साता अघिदेखि प्रशिक्षण शुरु गरिरहेका छन् ।

चोटका कारण लुका जोभिक र मारियानो डियाज टोलीको प्रशिक्षणमा अनुपस्थित रहेपछि प्रशिक्षक जिदानले युवा प्रतिभाहरुलाई पहिलो टोलीमा प्रशिक्षणको मौका दिएका हुन् । रियलले बुधबारदेखि १४–१४ जनाको समूह बनाएर प्रशिक्षण थालेको छ ।

जनवरीमा रियलमा अनुबन्ध भएयता रेनिएरले जिदानको टिमसँग प्रशिक्षण लिएको पहिलोपटक हो । रेनिएरले यसअघि क्यास्टिलामा राउलको प्रशिक्षणमा खेलेका थिए । जिदानले रेनिएरको प्रदर्शनलाई पछ्याइरहेको छ । सेगुन्डा ‘बी’ डिभिजन सकिएका कारण १८ वर्षीय रेनिएरले आउदो समरबाटै रियलको पहिलो टोलीमा मौका पाउने सम्भावना छ ।

स्पेनका यु–१९ टोलीका सदस्यसमेत रहेका मिगुएल गुटेरेज ला फाब्रिकामा उत्पादा भएका युवा प्रतिभा हुन् । उनले पनि अर्काे सिजनबाट रियलको पहिलो रोजाईका टोलीमा स्थान बनाउन सक्नेछन् । गुटेरेजले यसअघि रियलको पहिलो टोलीबाट यात्रा गरिसकेका छन् । गुटेरेजले म्युनिखमा भएको औडी कपमा जिदानको प्रशिक्षण पाएका थिए । उनी ला फब्रिकाबाट रियलको पहिलो रोजाईमा खेल्ने पहिलो खेलाडी बनेका छन् ।