एजेन्सी – स्पेनिस फुटबल मात्र नभएर युरोपेली फुटबलमा एक समय बार्सिलोना र रियल म्याड्रिडका आक्रामक तीन खेलाडीको जोडी निकै प्रख्यात थियो । बार्सिलोनामा लिओनेल मेस्सी, लुइस सुआरेज र नेयमारको एमएसएन जोडी र रियल म्याड्रिडमा ग्यारेथ बेल, करीम बेन्जेमा र क्रिस्टियानो रोनाल्डोको बीबीसीले तहल्का मच्चाएका थिए ।

दुवै टोलीका जोडीले लगातार उत्कृष्ट प्रदर्शन गर्दै सफलता हासिल गरे । विश्व फुटबलका भविष्य मानिएका नेयमारले सन् २०१७ मा बार्सिलोना छाडेर पीएसजी जाने निर्णय गर्दा सबै चकित परे । त्यसो त बार्सिलोनाले पनि पीएसजीबाट विश्व कीर्तिमानी रकम पाएको हुनाले नेयमारलाई रोक्न त्यति प्रयास गरेन । बार्सिलोनाले प्राप्त रकमबाट नेयमारको विकल्पमा खेलाडी किन्न सकिने सोचेको थियो ।

तर नेयमारले क्लब छाडेको ३ सिजन बितिसक्दा पनि उनको स्थान लिएर मेस्सी र सुआरेजलाई सहयोग गर्न सक्ने भने कोहि देखिएको छैन । यसबीचमा बार्सिलोनाले मोटो रकम खर्च गर्दै स्टार खेलाडीहरुलाई टोलीमा भित्र्याएको छ । यसै सिजन मात्र १८ मिलियन युरो खर्चेर मार्टिन ब्रेथवेट आक्रमणमा थप मजबुती दिन बार्सिलोना आएका थिए ।

त्यसअघि बार्सिलोनाले १ सय २० मिलियन युरो तिरेर एटलेटिको म्याड्रिडका स्टार एन्टोइन ग्रिज्मनलाई क्याम्प नोउमा ल्याएको थियो । घानाका मिडफिल्डर जेरोम बोटेङ र ब्राजिलियन विंगर माल्कम पनि ४१ मिलियन युरोमा बार्सिलोना आए, तर दुवैले खासै प्रभाव जमाउन सकेनन् । अर्का ब्राजिलियन विंगर फिलिपे कोउटिन्होले १ सय २० मिलियन युरोमा अनुबन्धन भएपनि अपेक्षा गरेअनुसार प्रदर्शन गरेनन् ।

जेरार्ड डेउलोफेउ १२ मिलियन युरोमा पुन: बार्सिलोना फर्किए । तर उनको बसाईं लामो समय रहन सकेन । फ्रान्सका युवा प्रतिभा ओस्मान डेम्बेले अनुबन्धन गर्न बार्सिलोनाले १ सय ५ मिलियन युरो खर्च गर्यो । तर निरन्तर चोट र अनुशासनको समस्यामा रुमल्लिएका उनी क्लबमा लामो समय टिक्ने सम्भावना देखिन्न ।

स्पेनी फरवार्ड पाको अल्कासेरका लागि बार्सिलोनाले ३० मिलियन युरो खर्चेको थियो । तर ५० खेलमा १५ गोल गरेपनि बार्सिलोनाको मागअनुसार प्रदर्शन गर्न नसक्दा उनको यात्रा पनि टुंगियो । एटलेटिको म्याड्रिडबाट ३६ मिलियन युरोमा आएका आर्डा टुरानले ५५ खेल खेलेका छन् । तर उनको नाम अहिले कमै समर्थकको मश्तिश्कमा रहेको छ ।

ट्रान्सफर रकमसँगै खेलाडीले खेल अनुसार पाउने बोनस हेर्ने हो भने यी खेलाडीमाथि हालसम्म ५ सय मिलियन युरोभन्दा बढी खर्च भएको छ । तर नेयमारको स्थान लिने सम्भावना भने कसैले देखाएका छैनन् । एन्टोइन ग्रिज्मनले एटलेटिकोमा देखाएको प्रदर्शन पहिलो सिजनमा दोहोर्याउन सकेनन् । क्लबले उनीमाथि निकै आशा राखेको छ ।

सन् २०१४ मा ८१ मिलियन युरोमा आएका लुइस सुआरेजले ६ सिजन क्लबमा बिताएका छन् । यसक्रममा उनले २ सय ७० खेल खेल्दै १ सय ९१ गोल गरेका छन् । उनको मेस्सीसँग राम्रो साझेदारी गर्दै क्लबको सफलतामा अहम भूमिका निर्वाह गरेका छन् ।