एजेन्सी – इटालियन क्लब इन्टर मिलानका अर्जेन्टिनी फरवार्ड मोउरो इकार्डी स्थायी रुपमा फ्रेन्च क्लब पेरिस सेन्ट जर्मेन (पीएसजी) मा बस्न तयार भएका छन् ।

पीएसजीबाट यो सिजन लोनमा खेलिरहेका इकार्डी स्थायी रुपमै फ्रान्समा बस्न तयार भएका हुन् । इकार्डीलाई फ्रान्समा राख्ने बिषयमा दुवै क्लब इन्टर मिलान र पीएसजी सहमत भएका छन् । इटालियन फरवार्डलाई पेरिसमा राख्न पीएसजीले इन्टर मिलानलाई ४५ मिलियन पाउन्ड दिन सहमत भएको छ । उनले ६ मिलियन पाउन्ड बोनस समेत पाउनेछन् ।

पीएसजीसँगको इकार्डीको सम्झौता २०२१ को मे महिनासम्म मात्रै रहेको थियो । उनी गत सिजन लोनमा पीएसजी पुगेका थिए । इकार्डी २०१३ मा इटालियन क्लब साम्पडोरियाबाट इन्टर मिलान पुगेका थिए । अर्जेन्टिनी फरवार्ड इकार्डी इन्टर मिलानको मुख्य प्रशिक्षकमा एन्टोनियो कोन्टे आएपछि क्लबबाट बाहिरिएका थिए । तर, फ्रान्समा इकार्डीले राम्रो प्रभाव जनाउन सफल भए ।

विश्व फुटबलका स्टार नेयमार र केलियन एमबाप्पे रहेको पीएसजीबाट २७ वर्षीय इकार्डीले यस सिजन सबै प्रतियोगितामा ३१ खेलमा २० गोल गर्न सफल भएका छन् । उनले पीएसजीबाट यो सिजन च्याम्पियन्स लिगको ६ खेलमा ५ गोल गरेका छन् ।

कोरोना महामारीका कारण फ्रेन्च लिग वान रद्ध भएर पीएसजी फ्रेन्च लिग च्याम्पियन घोषित हुँदा युइएफए च्याम्पियन्स लिग खेल्न बाँकी छ । पीएसजीले च्याम्पियन्स लिगको प्रि–क्वाटरफाइनलमा जर्मन प्रतिद्वन्द्वी बोरुसिया डर्टमुन्डलाई समग्रमा ३–२ ले पराजित गर्दै क्वाटरफाइन्लमा स्थान बनाएको छ । च्याम्पियन्स लिग अगस्टमा हुने तयारी छ ।