एजेन्सी – स्पेनिस क्लब रियल म्याड्रिडका मुख्य प्रशिक्षक जिनेदिन जिदानका छोरा तथा रियलका गोलरक्षक लुका जिदानले यो सिजनको अन्त्यसँगै क्लब छाड्ने भएका छन् ।

स्पेनिस पत्रिका मार्काका अनुसार २२ वर्षीय गोलरक्षक लुकाको सम्झौता यसै समरमा सकिँदैछ । उनी फ्रि ट्रान्सफरमार्फत फ्रेन्च क्लब मोन्टपेलिएर जाने सम्भावना रहेको छ  । जिदानले पहिलो रोजाईमा नियमित खेल्नको लागि नै क्लब छाड्ने योजना बनाएका हुन् ।

युवा गोलरक्षकले रियलको सिनियर टोलीको पहिलो रोजाईमा अवसर पाउने सम्भावना निकै न्यून देखेपछि भविष्य खोज्न अन्यत्र लागेका हुन् । रियलमा अहिले बेल्जियन स्टार थिवाउट कोर्टुवा र अल्फोन्स अरेओला रहेका छन् । दुवै राष्ट्रिय टोलीमा समेत नियमित खेल्दै आएका गोलरक्षक हुन् ।

जिदान यो सिजन दोस्रो डिभिजनको रेसिङ सान्टानडेरमा लोनमा खेलिरहेका छन् । उनले यो सिजन रेसिङको लागि २९ खेल खेलेका छन् । जुलाई १ मा जिदान र मोन्टपेलिएरबीच सम्झौता हुने बुझिएको छ।  लुका जिदान म्याड्रिडकै एकेडेमीमा हुर्किएका गोलरक्षक हुन् । बुवा जिनेदिन जिदान रियलको महत्त्वपूर्ण खेलाडीको रुपमा रहँदा लुका २००४ मा म्याड्रिडको एकेडेमीमा आबद्ध भएका थिए ।

लुकाले रियलको ‘बी’ टिमबाट ५० खेल खेलेका छन् । सिनियर टोलीबाट मात्रै दुई खेलमा अवसर पाएका छन् । लुकाले २०१८ मेमा भिल्लारियल विरुद्धको २–२ गोलको बराबरी तथा गत सिजन हुएस्काविरुद्ध ३–२ को जित निकालेको खेलमा पहिलो रोजाईमा अवसर पाएका थिए । दुवै खेल दौरान उनकै बुबा जिनेदिन नै प्रशिक्षक थिए । तर, म्याड्रिडका लेजेन्ड जिदानले त्यसपछि थिवाउट कोर्टुवा र अल्फोन्स अरेओलालाई प्राथमिकतामा राखेका थिए ।

मार्काका अनुसार लुका जिदानले गत सिजन नै रियलको सम्झौता नविकरणको प्रस्ताव अस्वीकार गरेका थिए । फ्रान्सका यु–२० टोलीका महत्वपुर्ण सदस्य रहिसकेका लुकाले आफुलाई युरोपको शीर्ष लिगमा स्थापित गर्ने आशा राखेका छन् । जिदानका अर्का छोरा इन्जो जिदान पनि सन् २०१७ मा रियल छाडेर ला लिगा क्लब अलाभेस पुगेका थिए । इन्जो हाल अल्मेरियाका लागि खेलिरहेका छन् ।