एजेन्सी – युभेन्टसका डिफेन्डर लिओनार्डो बोनुचीले आफ्ना सहकर्मी क्रिस्टियानो रोनाल्डोले कोप्पा इटालियाको सेमिफाइनलमा एसी मिलानविरुद्ध पेनाल्टीमा गोल गर्न नसक्दा उनको बचाउ गर्दै अभिव्यक्ति दिएका छन् ।

मिलानविरुद्ध खेलमा टोलीको कप्तानी सम्हालेका बोनुचीले जतिसुकै ठूलो खेलाडी पनि पेनाल्टीमा चुक्न सक्ने बताएका हुन् । ‘ रोनाल्डो हाम्रा लागि निकै महत्त्वपूर्ण खेलाडी हुन् । उनको उपस्थितिले नै विपक्षी डिफेन्समा दबाब बढ्छ । आज रोनाल्डोको भाग्य बलियो थिएन र मिलानका गोलरक्षक डोनारुम्माले पनि राम्रो खेले,’ उनले भने ।

‘पेनाल्टी त जस्तोसुकै ठूलो खेलाडी भएपनि कहिलेकाहिँ चुक्न सक्छन् । आज हाम्रो प्रदर्शन केहि खस्किएको महसुस भयो । लामो समयपछि मैदान फर्केका छौं । अब फेरी उही पुरानो युभेन्टस र रोनाल्डो देख्न पाउनुहुनेछ,’ उनले थपे ।

बोनुची अघिल्लो सिजन मात्र युभेन्टसबाट एसी मिलान पुगेका थिए । त्यहाँ एक सिजन बिताएपछि उनि पुन: टुरीन क्लब फर्किएका हुन् । बोनुचीले सेमिफाइनलमा मिलानले गरेको प्रदर्शनको प्रशंसा समेत गरे । उनले युभेन्टसको अबको ध्यान बुधबार हुने फाइनलमा रहेको बताए ।

‘आजको मुख्य लक्ष्य भनेको फाइनल पुग्नु थियो । अब त्यो प्राप्त भएपछि बुधबार फाइनलमा सबैको ध्यान रहेको छ । आजको खेलमा निकै फरक महसुस भयो,’ बोनुचीले भने ।

‘हामीले नयाँ वातावरणमा खेल्दा केहि असहज पनि भयो । सुरुवात राम्रो भएपनि खेल अगाडी बढ्दै जाँदा एकै लयमा खेल्न सकेनौं,’ उनले थपे, ‘ मिलानले निकै राम्रो प्रदर्शन गर्यो । मिलान १० खेलाडीमा समेटिए पनि अन्तिमसम्म हामी ढुक्क हुने अवस्था थिएन ।’