एजेन्सी – इंग्लिस प्रिमियर लिगको म्यानचेस्टर युनाइटेडले कोरोना भाइरस संक्रमणका कारण स्थगित भएको लिग सुचारु हुन लाग्दा तयारीस्वरूप खेलिएको मैत्रीपूर्ण खेलमा दोस्रो श्रेणीको वेस्ट ब्रोमसँग हार बेहोरेको छ ।

शुक्रबार युनाइटेडको मैदान ओल्ड ट्राफर्डमा भएको दुवै खेलमा घरेलु टोलीले बलियो टोली उतारेको थियो । पहिलो खेल २-१ ले गुमाएपनि दोस्रो खेलमा युनाइटेड ३-१ ले विजयी रहेको थियो । युनाइटेडले अघिल्लो साता नै स्टोकसिटीसँग खेल्ने तयारी रहेपनि अन्तिम समयमा खेल रद्द भएको थियो । स्टोकका प्रशिक्षक माइकल ओनिललाई कोरोना संक्रमण पुष्टि भएपछि खेल हुन सकेको थिएन ।

युनाइटेडले प्रिमियर लिग फर्कंदा पहिलो खेलमा टोटेनहम हट्स्परसँग खेल्दैछ । टोलीमा पहिलो पटक स्टार मिडफिल्डरद्वय ब्रुनो फर्नान्डेस र पल पोग्बा एकसाथ मैदानमा उत्रनेछन् । वेस्ट ब्रोमविरुद्ध पहिलो खेलमा फर्नान्डेसले युनाइटेडलाई अग्रता दिलाएका थिए । तर म्याट फिलिप्स र केनेथ जोहोरेले अन्त्यतिर गोल गरेपछि युनाइटेड पराजित भएको थियो ।

दोस्रो खेलमा युनाइटेडको आक्रमण नाइजेरियाका फरवार्ड ओडीओन इघालोले सम्हालेका थिए । भर्खर मात्र युनाइटेडमा लोन समय बढाएका उनले गोल गर्न भने सकेनन् । मिडफिल्डर आन्द्रेस परेराले दुई गोल गर्दै युनाइटेडलाई सुखद सुरुवात दिलाएका थिए । काइल एडवार्ड्सले वेस्ट ब्रोमका लागि गोल गरेपनि ताहित चोङले अन्तिम समयमा गोल गर्दै जित पक्का गरे ।