काठमाडौं (हाम्रो खेलकुद) – अस्वस्थका कारण वरिष्ठ उपाध्यक्ष पंकज बिक्रम नेम्वाङ अनुपस्थित रहेपछि अखिल नेपाल फुटबल संघ (एन्फा)को आपतकालिन समितिको बैठक स्थगित भएको छ ।

एन्फाले मानार्थ अध्यक्षसहितको विभिन्न ४ एजेन्डामा छलफल गर्न १ बजे आपतकालिन बैठक बोलाएको थियो । तर, वरिष्ठ उपाध्यक्ष नेम्वाङले स्वास्थ्यको कारण देखाउदै आउने नसक्ने बताएपछि एन्फाको बैठक स्थगित गरिएको एन्फाका महासचिव इन्द्रमान तुलाधरले जानकारी गराएका छन् ।
आपतकालिन बैठकमा कुनैपनि सदस्य अनुपस्थित रहेको खण्डमा बैठकको निर्णयको औचित्य नहुने भएपछि बैठक स्थगित भएको हो ।
एन्फाले आइतबार विभिन्न ४ एजेन्डामा छलफलको लागि आपतकालिन बैठक बोलाएको हो । एन्फाको आपतकालिन समितिमा अध्यक्ष कर्माछिरिङ शेर्पासहित चार उपाध्यक्ष पंकज विक्रम नेम्वाङ, कृष्ण थापा, वीरबहादुर खड्का र उपेन्द्रमान सिंह रहेका छन् ।

सोमबारको आपतकालिन बैठक स्थगित भएसँगै एन्फाले आपतकालिन कार्यसमितिको बैठक भोलिका लागि आह्वान गरेको हो । बैठक दिउँसो २ बजे बस्नेछ ।
एन्फाको आपतकालिन बैठकमा चार एजेन्डा मानार्थ अध्यक्षमा टासी घलेलाई पुनः ल्याउने विषय, कोरोना राहतको विषय, भक्तपुर जिल्ला फुटबल संघको विषय र विविध विषय रहेको थियो । मंगलबारको कार्यसमिति बैठकमा यही विषयमा छलफल र निर्णय हुनेछ ।