एजेन्सी – ब्राजिली प्लेकेर फिलिपे कौटिन्होले आफ्नो पुर्व इंग्लिस क्लब लिभरपुलमा फर्कने चाहना राखेका छन् । कौटिन्होले आफ्नो मुल्यमा कटौती गर्दै यसै समरमा लिभरपुलमा फर्कन चाहना राखेका हुन् ।

कौटिन्हो २ वर्षअघि लिभरपुलबाट स्पेनिस क्लब बार्सिलोना पुगेका थिए । पहिलो सिजन सोचेअनुरुपको प्रदर्शन गर्न नसकेपछि बार्सिलोनाले कौटिन्होलाई लोनमा जर्मन क्लब बायर्न म्युनिखमा पठाएको थियो ।

म्युनिखमा पनि उनले सोचेअनुरुपको प्रदर्शन गर्न सकेका छैनन् । त्यसैले बार्सिलोनाले यो समरमा कौटिन्होलाई बेच्ने सुचीमा राखेको छ । उनी अहिले चोटका कारण मैदान बाहिर छन् ।

मेट्रोका अनुसार २८ वर्षीय कौटिन्होले आफ्नो पारिश्रमिक कटौती गर्दै पुन मार्सिसाइड क्लबमा फर्कन तयार रहेको र यस विषयमा लिभरपुलका प्रशिक्षक योर्गेन क्लोपसँग छलफल भएको पनि उल्लेख गरिएको छ । बार्सिलोनाले कौटिन्होलाई ८० मिलियन युरोमा बेच्ने योजना अघि सारेको छ ।

कौटिन्हो २०१३ मा इटालियन क्लब इन्टर मिलानबाट लिभरपुल पुगेका थिए । कौटिन्हो २०१८ जनवरीमा १०५ मिलियन पाउन्डमा बार्सिलोना पुगेका थिए । उनले बार्सिलोनाका लागि ७६ खेलमा २१ गोल गरेका छन् । बायर्नका लागि ३२ खेलमा ९ गोल गरेका छन् । उनले बार्सिलोनाबाट दुईपटक स्पेनिस ला लिगा, समान एकपटक कोपा डेल रे र सुपरकोपा जितेका छन् ।