एजेन्सी – पोल्यान्ड तथा जर्मन क्लब बायर्न म्युनिखका स्टार फरवार्ड रोवर्ट लेवान्डोस्कीका एजेन्ट सिजारी कुचार्सकीले लेवान्डोस्की २०१४ मा स्पेनिस क्लब रियल म्याड्रिडमा अनुबन्ध नजिक रहेको खुलासा गरेका छन् ।

जर्मन बुन्डेसलिगामा गोल मेसिनको रुपमा चिनिने लेवान्डोस्कीले च्याम्पियन्स लिगको सेमिफाइनलको पहिलो लेगमा बोरुसिया डर्टमुन्डबाट रियलविरुद्ध एक्लैले चार गोल गरेका थिए । त्यो भन्दा अघि उनी सान्टियागो बर्नवेउमा अनुबन्ध नजिक पुगेको थियो । तर, उनले अन्ततः जर्मन बुन्डेसलिगालाई नै आफ्नो गन्तव्य ठान्दै बायर्न म्युनिखमा आबद्ध भए ।

‘रियल म्याड्रिडको आर्थिक प्रस्ताव राम्रो थियो,’ लेवान्डोस्कीका एजेन्ट सेजरीले अन्तर्वार्तामा भने, ‘मुख्य कुरा उनी त्यहाँ नम्वर एक स्ट्राइकर हुने थिएनन् । यसको अर्थ उनले रियलमा करिम बेन्जेमाको ब्याकअपको रुपमा जान राम्रो मानेनन् ।’

यसबीचमा जर्मन जाइन्ट बायर्नले पनि लेवान्डोस्कीसँग सम्झौतालाई अघि बढाइसकेको थियो । तर, रियल म्याड्रिडविरुद्धको खेलमा चार गोल गरेपछि अझ राम्रो गर्न चाहेको बताएका थिए ।

त्यतिबेला च्याम्पियन्स लिगमा बायर्न म्युनिखले बोरुसिया डर्टमुन्डलाई हराउदै उपाधि जितेको थियो । सेमिफाइनलमा बायर्नले बार्सिलोनालाई तथा डर्टमुन्डले रियल म्याड्रिडको चुनौती पन्छाएको थियो ।

बायर्न जानु दुई साता अघिमात्रै लेवान्डोस्कीले आफ्नो सोच बदल्दै रियलमा जाने योजना बनाएका थिए । ‘यो कुरापछि बायर्न रिसायो । मैले केही अप्रिय शब्दको सामना गरे । क्लबले पनि दवावको प्रतिरोध गर्‍यो । बोर्डलाई विश्वस्त तुल्याउँदै अन्त्यमा थप २५ मिलियन युरोमा सहमति भएपछि उनी बायर्न पुगे,’ एजेन्ट सेजरीले भने ।

उनी फ्रि ट्रान्सफरमा बायर्नमा आवद्ध भएका हुन् । सन् २०१० मा पोलिस क्लब लेक पोज्नानबाट डर्टमुन्ड आएका ३१ वर्षीय लेवान्डोस्कीले डर्टमुन्डका लागि १८७ खेलमा १०३ गोल गरे । जारी बुन्डेसलिगामा पनि सर्वाधिक गोलकर्ताको सुचीमा शीर्षस्थानमा रहेका लेवान्डोस्कीले बुन्डेस लिगामा ३१ गोल तथा बायर्नका लागि यो सिजन ४० खेलमा ४६ गोल गरेका छन् ।