एजेन्सी – इटालियन फुटबलको शीर्ष नकआउट प्रतियोगिता कोप्पा इटालियाको फाइनलमा आज राति युभेन्टस र नेपोलीबीच प्रतिस्पर्धा हुँदैछ । खेल स्टेडियो ओलम्पिको रोमामा नेपाली समयअनुसार राति १२ः४५ बजेपछि हुनेछ ।

युभेन्टसले एसी मिलानको तथा नेपोलीले इन्टर मिलानको चुनौती पन्छाउदै फाइनलमा भेट पक्का गरेको थियो । कोप्पा इटालियाको सर्वाधिक सफल युभेन्टस १४औं उपाधि जित्ने दाउमा हुनेछ । गत सिजन क्वाटरफाइनलबाटै बाहिरिएको युभेन्टसले त्यसअघि लगातार चार सिजन उपाधि जितेको थियो ।

युभेन्टस यो सिजन उपाधि जित्ने लक्ष्यसहित मैदानमा उत्रनेछ । सुपरस्टार फरवार्ड क्रिस्टियानो रोनाल्डोको साथ रहेको युभेन्टसलाई पाउलो डिबाला, जुवान क्वाड्राडो, ब्लेइस म्याटुइडी, सामी खेडिरा, म्याथिस डि लेग्ट, लियोनार्डो बोनुची र डानिलोको साथ रहनेछ । भेट्रान गोलरक्षक जियानलुजी बुफोनको पनि टोलीमा छन् । युभेन्टसका आरोन राम्सी, जर्जियो चिलियनी र गोन्जलो हिगुआइन चोटका कारण खेल्ने छैनन् ।

यता, नेपोली २०१४ पछि अर्थात ६ वर्षपछि कोपा इटालियाको च्याम्पियन बन्ने योजनमा मैदान उत्रनेछ । पाँचपटकको च्याम्पियन नेपोलीले २०१४ मा फियोरेन्टिनालाई ३–१ ले पराजित गर्दै उपाधि जितेको थियो । युभेन्टसविरुद्ध लोरेन्जो इन्सिग्ने, ड्रिएस मर्टेन्स, मारियो रुई, फावियन र जियोभानी डि लोरेन्जो मुख्य हतियार हुनेछन् ।

पछिल्लो २५ खेलको नतिजा हेर्दा नेपोलीविरुद्ध युभेन्टस नै हावी देखिएको छ । युभेन्टसले १३ खेलमा जित हात पार्दा नेपोलीले ७ खेल आफ्नो पक्षमा पार्दा ५ खेल बराबरीमा टुंगिएको छ । युभेन्टस नेपोलीसँग २०१७ अप्रिलयता अपराजित छ । त्यतिबेला युभेन्टस नेपोलीसँग ३–२ ले पराजित भएपनि समग्रमा ५–४ को जित निकाल्दै फाइनलमा प्रवेश गरेको थियो ।

त्यसबेला फाइनलमा युभेन्टसले लाजियोलाई २–० ले पराजित गर्दै १२औं पटक कोपा इटालियाको च्याम्पियन बनेको थियो । त्यसयताको ६ खेलमा युभेन्टसले शतप्रतिशत जित निकालेको छ । यही जितको निरन्तरता दिने लक्ष्यमा युभेन्टस रहनेछ । युभेन्टस पछिल्लो दुई खेलमा अपराजित छ । युभेन्टस च्याम्पियन्स लिगको प्रि–क्वाटरफाइनलमो पहिलो लेगमा लियोनसँग पराजित भएको थियो ।

यता, नेपोली युभेन्टससँगको लगातार हारको श्रृंखला तोड्दै च्याम्पियन बन्ने दाउमा हुनेछ । नेपोली पछिल्लो ६ खेलमा अपराजित छ । यसक्रममा नेपोलीले बार्सिलोना र इन्टर मिलानजस्तो बलियो टोलीसँग बराबरी खेलेको छ ।

च्याम्पियन बन्ने टोलीले बन्द रंगशालामा मेडल सेरोमोनीमा आफै मेडल र ट्रफी उचाल्नुपर्नेछ । कोरोना त्रासका कारण ट्रफी उचाल्दा पनि सामाजिक दुरी अपनाउनु पर्ने छ ।