दिपक बोहोरा, पाँचथर

पटक पटक पूर्न निर्माण हुँदै आएको फिदिम माविको मैदानमा रंगशाला बनाउने भन्दै टेन्डर खुलेपछि स्थानियबासी खुसी भएका छन् । तर, जग्गा पर्याप्त नभएका कारण त्यहाँ नाइन ए साइडको मैदान मात्र बन्न सक्छ । इलाभेन ए साइडका लागि पर्याप्त जग्गा नहुँदा केहि खल्लो भने भएको छ ।

यद्दपी, इलाभेन ए साइडका लागि जग्गा खरिदका विषयमा पनि चर्चा भने हुने गरेको छ । तर, जसरी त्यो मैदान पूर्न निर्माणका लागि खर्च भएको छ । त्यो अनुरुपको मैदान तयार हुन नसक्दा स्थानिय निराश पनि छन् । फिदिम बजारमा रहेको एक मात्र खेल मैदानका रुपमा रहेको फिदिम माविको मैदानमा पछिल्लो ३ वर्षमा एक करोड २० लाख रुपैयाँ खर्च भएको छ ।

तर, त्यति ठूलो रकम खर्च हुँदा पनि मैदान भने खेल्ने अवस्थामा छैन । अहिले समको खर्च हेर्दा लगानी बालुवामा पानी जस्तै भएको छ ।
दुई वर्ष अघि कर्मा छिरिङ शेर्पा अखिल नेपाल फुटबल संघ (एन्फा) को अध्यक्षमा निर्वाचित भएपछि खेल मैदानका लागि १० लाख रुपैयाँ विनियोजन भएको थियो ।

पाँचथर जिल्ला फुटबल संघमार्फत पहिलो चरणमा कामका लागि ७ लाख रुपैयाँ बनेट निकासा भएको थियो । उक्त रकमबाट घेराबार लगाइएको थियो । पछिल्लो किस्ता रकम निकास हुनुअघि नै जिल्ला फुटबल संघमा विवाद बढ्यो । जसले गर्दा दोस्रो किस्ता निकासा भएन ।

दशौं फाल्गुनन्द गोल्डकपको उद्घाटनका लागि पुगेका प्रदेश १ का आर्थिक मामिला तथा योजना मन्त्री इन्द्रबहादुर आङबोले मैदानमा दुवो लगाउन सुझावलाई बजेट दिने वचन दिए । गत वर्ष सामाजिक बिकास मन्त्रालय मार्फत दुवो रोप्न र प्यारापिट निर्माणका लागि भनेर ५० लाख रुपैयाँ प्राप्त भएको फुटबल संघ पाँचथरका अध्यक्ष सुजन नेम्बाङले बताए ।

सो रकमले झापाबाट दुवोको बिउ ल्याएर रोप्ने र प्यारापिट निर्माण भएको थियो । तर दुवो रोप्दै गर्दा मैदानको तल्लो भाग पहिरो गयो जसले गर्दा मैदान खेल्न नमिल्ने अवस्थामा पुग्यो । हरियो बन्दै गरेको दुवो पनि पनि खेर गयो । त्यो लगानी पनि खेर गयो ।

मैदान भत्किए पछि दुवो सहित ११ औं फाल्गुनन्द गोल्डकप र चौथो पाँचथर गोल्डकप गर्ने सपना पुरा हुन सकेन । मैदान पूर्न निर्माण नभएर दुवै गोल्डकप हुन सकेनन् । अहिले खेलाडी प्रशिक्षणमा पनि समस्या छ ।

चालु आर्थिक वर्षमा प्रदेश सरकारबाट भत्किएको मैदानको एकातर्फ पर्खाल निर्माण लगायतको कामका लागि ६० लाख रुपैयाँ विनियोजन भएको थियो । जसको कारण पनि अन्तिम चरणमा पुगेको उपभोक्ता समितिका अध्यक्ष किरण श्रेष्ठले बताए ।

अहिले सो रकमबाट ९० प्रतिशत काम सम्पन्न भई सकेको श्रेष्ठले जानकारी दिए । पर्खाल निर्माण, सानो प्यारापिट निर्माण गर्ने, इटाको पर्खाल र रेलिङको काम सम्पन्न भएको उनले बताए । पुराना निर्माण भइसकेका संरचनाको जोगाएर नयाँ संरचना बनाइएको श्रेष्ठले सुनाए ।

अहिले सोहि मैदानलाई रंगशाला बनाउने भन्दै राष्ट्रिय खेलकुद परिषद (राखेप) बाट १६ करोड रुपैयाँको टेन्डर खुलेको छ । रंगशाला बन्ने भएपछि यसअघिका संरचना काम नलाग्ने सम्भावना बढेको छ । पटक पटक खर्च गरिएको मैदानमा अब यसअघिको खर्च पनि बालुवामा पानी जस्तै हुने देखिएको छ ।