एजेन्सी – स्पेनिस ला लिगा अन्तर्गत मंगलबार राती बार्सिलोनाले घरेलु मैदान क्याम्प नोउमा लेगानेसलाई २-० ले पराजित गर्यो । दोस्रो हाफको ६८ औं मिनेटमा मेस्सीले पेनाल्टीमा गोल गर्दै बार्सिलोनालाई सुदृढ अवस्थामा पुर्याएका थिए ।

समग्रमा मेस्सीले स्पेनिस ला लिगामा गरेको यो ५६ औं पेनाल्टी गोल थियो । पेनाल्टीमा सर्वाधिक गोल गर्ने सुचिमा उनी रियल म्याड्रिड र एटलेटिको म्याड्रिडका फरवार्ड ह्युगो सान्चेजसँग बराबरीमा पुगेका छन् । यस सुचीको शीर्षस्थानमा भने रियल म्याड्रिडका पूर्व फरवार्ड क्रिस्टियानो रोनाल्डो रहेका छन् ।

रोनाल्डोले रियल म्याड्रिडमा छँदा पेनाल्टीबाट मात्र ६१ गोल गरेका थिए । उनी क्लबका एकमात्र पेनाल्टी प्रहार गर्ने खेलाडी रहेका थिए । बार्सिलोनामा भने बेलाबखत अन्य फरवार्डले पनि पेनाल्टी प्रहार गर्दै आएका छन् ।

पेनाल्टीमा गोल गर्ने सँगै चुक्ने सुचिमा भने मेस्सी रोनाल्डोभन्दा अगाडी छन् । ३२ वर्षीय मेस्सीले स्पेनिस लिगमा हालसम्म १२ पटक पेनाल्टीमा गोल गर्न सकेका छैनन् । यता रोनाल्डो भने सन् २०१८ मा युभेन्टस प्रस्थान गर्नुअघि ११ पटक पेनाल्टीमा चुकेका थिए ।

जारी सिजन मेस्सीले बार्सिलोनाबाट खेल्दा पेनाल्टीमा ४ गोल गरेका छन् भने कुनैमा चुकेका छैनन् । रोनाल्डोले भने पेनाल्टीमा ८ गोल गर्दा एकपटक गोल गर्न चुकेका छन् । कोप्पा इटालियाको सेमिफाइनलमा एसी मिलानविरुद्ध रोनाल्डोको पेनाल्टी प्रहार पोस्टमा लगेर फर्केको थियो ।

समग्रमा मेस्सीले ३३ खेलमा २६ गोल र १८ असिस्ट दिएका छन् । रोनाल्डोले भने ३३ नै खेलमा २५ गोल र ३ असिस्ट दिएका छन् । बार्सिलोना र युभेन्टस दुवै टोली लिगको शीर्षस्थानमा रहेका छन् ।