काठमाडौं (हाम्रो खेलकुद) – अखिल नेपाल फुटबल संघ (एन्फा) ले आफु मातहातका तीन वटा स्थायी समितिका संयोजक परिवर्तन गरेको छ । एन्फाको निर्णयप्रति भने वरिष्ठ उपाध्यक्ष पंकजविक्रम नेम्वाङले घोर आपत्ति जनाएका छन् ।

आफुसँग असन्तुष्ट रहेको उपाध्यक्ष नेम्वाङ संयोजक रहेको पद पूर्ति समितिको संयोजकको जिम्मेवारी मानार्थ उपाध्यक्ष शिक्षित पराजुलीलाई दिइएको छ । नेम्वाङ नै संयोजक रहेको जिल्ला समन्वय समितिको संयोजकको जिम्मेवारी एन्फा उपाध्यक्ष वीरबहादुर खड्कालाई दिइएको छ ।

त्यस्तै रत्नकुमार श्रेष्ठलाई फुटसल समितिको संयोजकको जिम्मेवारी दिएको एन्फाले जनाएको छ । फुटसल समितिमा यसअघि दावा लामा संयोजक थिए । सदस्य लामा पनि एन्फा अध्यक्ष शेर्पासँग असन्तुष्ट रहँदै आएका छन् । तीनै समितिको अन्य सदस्य भने यथावत रहने एन्फाले जनाएको छ ।

अध्यक्ष शेर्पाले समितिहरु निस्क्रिय अवस्थामा रहेकोले परिवर्तन गरिएको बताए । ‘समितिले काम गर्न सकिरहेको थिएन । हालसम्म कुनै प्रतिवेदन पनि पेस भएको छैन । दुई वर्षसम्म निस्क्रिय रहेकाले क्रियाशील बनाउन परिवर्तन गरेका हौं । कार्यसमितिले माघ २६ बैठकबाट परिवर्तन अधिकार दिएको थियो, त्यसैको आधारमा नयाँ नियुक्ति दिएका हौं,’ शेर्पाले भने ।

यता वरिष्ठ उपाध्यक्ष नेम्वाङले बने एन्फाले प्रतिशोधको भावना बोकेर निर्णय लिएको अभिव्यक्ति दिए । उनले विधान विपरित गएर एन्फाले अन्याय गरेको पनि बताए ।

‘निर्णय सुन्दा आश्चर्यमा परें । यसमा हाम्रो घोर आपत्ति छ । एन्फाको विधानअनुसार स्थायी समितिको कार्य अवधि ४ वर्ष हुन्छ भन्ने स्पष्ट छ । केन्द्रीय समितिले नियुक्त गर्ने हो तर हटाउने प्रावधान छैन । हामीले आजपनि विगतका दिनझैं पारदर्शी, सामुहिक नेतृत्वको कुरा लगातार उठाईरहेका छौं, तर अहिले पनि नेतृत्वले तानाशाही ढंगले आफ्नै हिसाबमा एन्फा चलाइरहेको आभास भएको छ,’

‘ अहिलेको नेतृत्वले विधिको शासनको उल्लङ्घन गरेको छ । हामीलाई प्रतिशोधको नजरले हेरेर निर्णय लिइएको हो । हामीले काम गरेको छैन भन्ने हो भने प्रश्न उठाउनु पर्छ । हामीलाई सिधै कारवाही गर्नु न्यायोचित भएन,’ नेम्वाङले थपे ।