एजेन्सी – कोरोना महामारीपछिको पहिलो खेलमा म्यानचेस्टर सिटीले इंग्लिस प्रिमियर लिगमा आर्सनलमाथि सानदार जित निकालेको छ । सिटीले १० खेलाडीमा समेटिएको आर्सनलमाथि ३–० को सानदार जित निकालेको हो । 

घरेलु मैदान इतिहाद स्टेडियममा बुधबार राति भएको खेलमा सिटीको सहज जितमा रहिम स्ट्रलिङ, केभिन डि ब्रुयन र फि फोडेनले गोल गरे । पहिलो हाफमा १ तथा दोस्रो हाफमा दुई गोल सम्भव भएको थियो । एकपक्षीय बनेको खेलमा सिटीले पहिलो गोलको लागि पहिलो हाफको इन्ज्युरी समय नै कुर्नुपरेको थियो ।

छैटौ मिनेटमा केभिन डि ब्रुयनको फ्रिकिक आर्सनलका गोलरक्षक बन्ड लेनोले बचाए । ३५औं र ३६औं मिनेटमा गोलरक्षक लेनोले रहिम स्ट्रलिङ र कीतान डेभिड सिल्भाको प्रहारलाई विफल पारेका थिए । त्यसपछि पुनः लेनोले ३८औं मिनेटमा रियाद महारेज र ४०औं मिनेटमा स्ट्रलिङको प्रहार विफल पार्दा सिटी चुकचुकाएको थियो ।

सिटीको प्रहारलाई लगातार विफल पारिरहेको गोलरक्षक लेनोले अन्ततः सिटीको प्रहारलाई जोगाउन सकेन । पहिलो हाफको इन्ज्युरी समयमा स्ट्रलिङले गोल गर्दै सिटीलाई अग्रता दिलाए । डिफेन्डर डेभिड लुइजको कमजोर डिफेन्सको फाइदा उठाउदै ब्रुयनले दिएको पासलाई रहिमले गोल गरेका थिए ।

दोस्रो हाफको शुरुमै आर्सनल १० खेलाडीमा समेटियो । ४९औं मिनेटमा डिफेन्डर लुइजले पेनाल्टी बक्समा रियाद महारेजमाथि फउल गरेपछि रेफ्रीले सिधै रातो दिदै मैदान बाहिर पठाएपछि आर्सनल १० खेलाडीमा समेटियो । त्यसमै प्राप्त पेनाल्टीमा केभिन डि ब्रुयनले गोल गर्दै सिटीको अग्रता दोब्बर पारे ।

त्यसपछि पनि सिटीले आर्सनलमाथि लगातार दवाव सिर्जना गरिरहँदा गोलरक्षक लेनो निकै व्यस्त बने । ६९औं मिनेटमा ब्रुयन चुके । ७८औं मिनेटमा स्ट्रलिङको प्रहारले पोस्टको गति लिन सकेन । इन्ज्युरी समयको थप गरिएको पहिलो मिनेटमा फिल फोडेनले गोल गर्दै सिटीलाई ३–० को सहज जित दिलाए ।

सिटीले पनि अन्तिम १२ मिनेट १० खेलाडीमा समेटिएर खेल्नुपरेको थियो । खेल अन्त्य गरेको थियो । पाँच खेलाडी सब्सिच्युट गरिसकेपछि डिफेन्डर इरिक गार्सिया आफ्नै गोलरक्षक इडर्सनसँग जुध्दै गम्भीर चोट बोक्न पुगेको थियो ।

यो जितले सिटीले शीर्षस्थानको लिभरपुलसँगको अंक दुरी २२ मा छोट्याएको छ । सिटीको यो जितले लिभरपुलले उपाधिको लागि थप कुर्नुपर्ने भएको छ । सिटीको २९ खेलबाट ६० अंक पुगेको छ । लिभरपुलको ८२ अंक छ । समान खेलबाटै आर्सनल ४० अंक जोडेर नवौं स्थानमा यथावत छ ।

यस्तै प्रिमियर लिगाको अर्काे खेलमा एस्टन भिल्ला र सेफिल्ड युनाइटेडले गोलरहित बराबरी खेल्दै अंक बाँडेका छन् । बराबरीसँगै सेफिल्डले पाँचौ स्थानमा उक्लने अवसर गुमाउदा एस्टन भिल्लाले पनि रेलिगेसन जोन छाड्न सकेन ।

सेफिल्ड ४४ अंक जोडेर छैटौं स्थानमा यथावत रहँदा भिल्ला २६ अंक जोडेर १९औं स्थानमा यथावत छ । सेफिल्डलाई पराजित गर्न सकेको भए भिल्ला १६औं स्थानमा उक्लने थियो ।