एजेन्सी – अर्जेन्टिनी तथा क्याटलान क्लब बार्सिलोनाका कप्तान लियोनेल मेस्सीले शर्तसहित क्लबसँग सम्झौता नवीकरण गर्न तयारी गरेका छन् । मेस्सीले थप दुई वर्ष बार्सिलोनासँग सम्झौता गर्न सहमत भएको बुझिएको छ ।

नयाँ सम्झौता भएको अवस्थामा मेस्सी २०२३ सम्म बार्सिलोनामा रहनेछन् । हाल मेस्सीको सम्झौता अर्काे सिजनको समरसम्म रहेको छ । क्लबका अध्यक्ष जोसेप मारिया बार्टाेमेउ नयाँ शर्तमा मेस्सीलाई सम्झौता नवीकरण गर्न हतास छन् । नयाँ शर्तअनुसार मेस्सीले चाहेको अवस्थामा क्लबले रोक्न पाउने छैन । उनले आफूलाई चाहिएको अवस्थामा क्लब छोड्न सक्नेछन् ।

पछिल्लो समय मेस्सी र अध्यक्ष बार्टाेमेउबीच राम्रो सम्बन्ध रहेको छैन । सोही कारण पनि मेस्सीले आफ्नो रिलिज क्लजसहित क्लब छाड्ने मनासय बनाएका थिए । स्पेनिस पत्रिका मुन्डो डिपोर्टिभोका दावी अनुसार नयाँ सम्झौतामा मेस्सीको वर्तमानमा रहेको शर्तहरु हुनेछन् । र मेस्सीलाई क्लब छोड्न चाहेको अवस्थामा सम्झौता रद्ध गर्न मौका दिइनेछ ।

पछिल्लो समय मेस्सीका बवा तथा एजेन्ट जर्ज र क्लबका अध्यक्ष बार्टाेमेउबीच लगातार वार्ता भइरहेको छ । तर, औपचारिक निर्णय हुन सकेको छैन । यो अवस्थामा बार्सिलोना ला लिगा र च्याम्पियन्स लिग जित्ने अभियानमा केन्द्रित रहेको छ ।

३२ वर्षीय मेस्सीले २०१७ मा बार्सिलोनासँग थप चार वर्षे सम्झौता नवीकरण गरेको थिए । तर, मेस्सीले यसअघि नै बार्सिलोनाबाटै आफ्नो खेल करियर अन्त्य गर्ने योजना रहेको बताएका थिए । २००५ देखि बार्सिलोनामा रहेका मेस्सीले हालसम्म बार्सिलोनामा आठपटक सम्झौता नवीकरण गरेका छन् ।

लेजेन्ड खेलाडी रहेका मेस्सीले बार्सिलोनाबाट हालसम्म विभिन्न ३४ उपाधि जितेका छन् । जसमा १० स्पेनिस ला लिगा र ४ च्याम्पियन्स लिग समावेश छन् ।