एजेन्सी – रियल म्याड्रिडले स्पेनिस ला लिगा अन्तर्गत आइतबारको खेलमा रियल सोसीडाडलाई पराजित गर्दै अंक तालिकाको शीर्षस्थानमा उक्लने क्रममा बार्सिलोनालाई पछाडी पार्यो ।

रियलले मैदानभित्र लगातार जित दर्ता गरेपनि मैदानबाहिर भने टोलीलाई लिएर अनेक टिप्पणी हुन थालेका छन् । सोसीडाडविरुद्ध जितपछि रियल म्याड्रिडका प्रशिक्षक जिनेदिन जिदानले रियलको मैदानभित्रको प्रदर्शन रेफ्रीबारे अनावश्यक टिप्पणीका कारण छायाँमा परेको बताएका छन् ।

सोसीडाडविरुद्ध खेलमा भिनिसियस जुनियरको पेनाल्टी, अदनान जानुजाजको गोल मान्य नहुनु र बेन्जेमाको गोलले मान्यता पाउँदा रेफ्रीले भिडियो असिस्टेन्ट रेफ्री (भीएआर) को सहायता लिएका थिए । यी सबै क्षणबारे जिदानलाई खेलपछि पत्रकार सम्मेलनमा प्रश्न गर्दा उनको जवाफ यस्तो थियो :

‘म आफैंले सबै रिप्ले हेर्न भ्याएको छैन । तर मलाई प्राप्त सूचना अनुसार भिनिसियसलाई लडाएकोमा पेनाल्टी थियो र बेन्जेमाको गोल पनि मान्य नै हो । म यसबारे धेरै चर्चा गर्न चाहन्न किनकि मैदानभित्र रेफ्री निर्णय दिन बसेका हुन् र त्यो उनको जिम्मेवारी हो ।’

‘म मात्र यति भन्न चाहन्छु की हामि जितको हकदार थियौं । हाम्रो जितको बारेमा भन्दा रेफ्रीको बारेमा बढी चर्चा हुँदा म आजित भएको छु । कतिले त यसरि कुरा गरेका छन् की हामीले मैदानमा केहि नगरी रेफ्रीले जिताएका हुन् ।’

‘हामी अरुले के भन्छन् त्यसमा नियन्त्रण राख्न सक्दैनौं । हामी मैदानमा जित्न जान्छौं र आज हाम्रो लक्ष्य पूरा भएको छ । हाम्रो मैदानमा प्रदर्शन हेर्दा जितका हकदार थियौं र खेलाडीको मिहिनेतले यो सम्भव भएको हो ।’

यस जितसँगै रियल अंक तालिकाको शीर्षस्थानमा पुगेपनि जिदानले भने उपाधिका बारेमा अहिले नै सोच्ने बेला भइनसकेको प्रष्ट पारे ।

‘अझै धेरै खेल खेल्न बाँकी छ । हामी हरेक तीन दिनमा खेलिरहेका हुन्छौ । प्रत्यक खेलमा दबाब त्यसै किसिमको हुन्छ । यो राम्रो छ की हामि सबैले एउटै लक्ष्य राखेका छौं र उक्त लक्ष्य प्राप्तिका लागि एकतृत भएर अगाडी बढेका छौं ।’

‘आजको जित आवश्यक थियो र हामीले अन्त्यमा ३ अंक हासिल गर्यौं । यसले हाम्रो लक्ष्यमा थप बढावा पुगेको छ । लिगमा अझै ८ खेल बाँकी रहेका छन् । र मलाई लाग्छ अन्तिम खेल नपुग्दासम्म लिगको टुंगो लाग्ने छैन ।’

‘ हामीले अहिलेसम्म केहि पनि प्राप्त गरेका छैनौँ । कोरोनापछि ९ अंक जोडेर हामीले लय समातेका छौँ । अन्त्यसम्म पुग्दा निकै कठिन परिस्थितिको सामना गर्नुपर्ने हुन्छ । तर हामी लक्ष्यमा दत्तचित्त भएर अगाडी बढ्नेछौं ।’

‘ हामीसँग निकै राम्रो वातावरण सिर्जना भएको छ । खेलाडीहरु पनि सबैले राम्रो प्रतिक्रिया दिइरहेका छन् । हामी सधैं एक कदम अगाडी बढेर सुधार गर्न चाहन्छौं र यो भावनाको विकास सबै खेलाडीमा छ । हामी अहिले यस्तो टोलीसँग छौं जो मात्र जित्न चाहन्छ ।’

सोसीडाडविरुद्ध खेलमा सर्जियो रामोस घुंडाको चोटका कारण दोस्रो हाफमा मैदानबाट बाहिरिएका थिए । फरवार्ड एलेक्जेन्डर इसाकसँग घुँडा जुध्ददा उनी घाइते भएका थिए । जिदानले उनको प्रशंसा गर्दै चोटबारे पनि जानकारी दिए ।

‘ खेल सकिएलगत्तै पनि उनको घुँडामा निकै दुखाइ महसुस भएको थियो । हामीले हेर्दा सामान्य चोट जस्तो देखिएको छ । अब भोली स्थिति हेरेपछि आवश्यक हुँदा विस्तृत परिक्षण गर्नुपर्ने हुन्छ,’ जिदानले भने, ‘ उनी विश्वका सर्वोत्कृष्ट डिफेन्डर हुन् । उनले आफ्नो प्रभाव सबै टोलीमा छाडेका छन् ।’