एजेन्सी – रियल म्याड्रिडका हामेस रोड्रिग्वेजले आइतबार रियल सोसिडाडविरुद्ध पहिलो रोजाईमा मौका पाउनु धेरैका लागि आश्चार्यजनक निर्णय थियो । प्रशिक्षक जिनेदिन जिदानले धेरैलाई आश्चार्यमा पर्ने गरि त्यो निर्णय लिएका थिए ।

कोलम्बियन मिडफिल्डरले त्यो मौकालाई भने पूर्ण रुपमा सदुपयोग गर्न सकेनन् । अक्टुबर यता राम्रो प्रदर्शन गर्न नसकेको उनलाई जिदानले करिम बेन्जेमा र भिनिकसुसँगै अग्रपंक्तिमा उतारेका थिए । राइट विङ्समा खेलाइएका हामेस त्यो पोजिसनमा खासै सहज देखिएनन् । टोलीको आक्रमणमा उनी खासै सहभागी भएको देखिएन ।

३० मिनेटपछि उनलाई राइटबाट लेफ्टतर्फ खेल्न लगाइएको थियो । त्यसपछि भने २८ वर्षे खेलाडीको प्रदर्शनमा सुधार देखियो । मध्यान्तरपछि भने उनी बढी समय मिडफिल्डमा खेले । ७८ औं मिनेटमा भने उनको ठाँउमा मार्को एसेन्सियोलाई खेलाएको थियो । तर, जिदानलाई प्रभाव पार्ने मौका भने हामेसले खासै सदुपयोग गर्न सकेनन् ।

जबकी जिदानले कम्तीमा उनलाई यो सिजन मौका दिने निर्णय लिएका थिए । सोसिडाडलाई २–१ ले हराएसँगै बार्सिलोनालाई पछि पार्दै रियल ला लिगाको शीर्ष स्थानमा उक्लेको छ । ३० खेलमा समान ६५ अंक जोडेका यी दुई टोलीमा हेड टु हेडका आधारमा रियल शीर्षस्थानमा रहेको छ ।