एजेन्सी – साविक विजेता तथा अंक तालिकाको शीर्ष स्थानमा रहेको युभेन्टसले इटालियन सिरी ए अन्तर्गत सोमबार बोलोग्नाको सामना गर्दैछ । खेल नेपाली समयानुसार रातको १ :३० बजे सुरु हुनेछ ।

कोप्पा इटालियाको फाइनलमा नेपोलीसँग हार बेहोरेपछि युभेन्टस लिगमा भने आफ्नो पकड कायम राख्न चाहन्छ । सेमिफाइनलमा एसी मिलानविरुद्ध औसत प्रदर्शन गर्दै गोलरहित बराबरीमा रोकिएको युभेन्टस फाइनलमा नेपोलीसँग टाइब्रेकरमा पराजित भएको थियो । लगातार नराम्रो प्रदर्शनपछि सार्रीको रणनीतिमाथि प्रश्न पनि उठ्न थालेको छ ।

युभेन्टसले लिग अन्तर्गत पछिल्लो ६ अवे खेलमध्य ३ खेलमा पराजय भोगेको छ । घरेलु मैदानमा बोलोग्नाको प्रदर्शन राम्रो रहेको छ । बोलोग्नाले लिगमा मात्र ४ खेलमा हार बेहोरेको छ । लिगमा भेरोना (३), इन्टर मिलान (१), लाजियो र युभेन्ट्स (०) ले मात्र घरेलु मैदानमा योभन्दा सुखद नतिजा निकालेका छन् ।

बोलोग्नाले अर्को सिजन युरोपा लिगमा छनोट हुनका लागि निकै  मिहिनेत गर्नुपर्ने देखिन्छ । टोली छैटौं स्थानको नेपालीभन्दा ५ अंक पछाडी रहेको छ । तर घरेलु मैदानमा बलियो नतिजा र युभेन्टसको खस्कँदो प्रदर्शनले बोलोग्नालाई खेलअघि मनोबल भने बढेको छ ।

बोलोग्नाका लागि जार्दी सुटेन, फेडेरिको सान्टान्डेर र माटिया बानी प्रतिबन्धका कारण उपलब्ध छैनन् । बोलोग्नाका लागि मिचेल दिज्क्स भने चोटका आक्रान लामो समयको विश्रामपछि मैदान फर्कने तयारीमा छन् ।

युभेन्टसका ब्राजिलियन डिफेन्डर एलेक्स सान्ड्रो चोटका कारण उपस्थित हुने छैनन् । उनको स्थानमा माटिया डी सिलिओले लेफ्ट ब्याकको भूमिका निर्वाह गर्नेछन् । गोलरक्षकमा जियानलुइजी बुफोनको स्थानमा वोजचिएक सेचेज्नीले खेल्ने सम्भावना रहेको छ ।