एजेन्सी – फरवार्ड क्रिस्टियानो रोनाल्डो र पाउलो डिबालाले पहिलो हाफमै गोल गरेपछि साविक विजेता युभेन्टसले इटालियन सिरी ए अन्तर्गत सोमबार बोलोग्नाविरुद्ध पहिलो हाफमा २-० को अग्रता लिएको छ ।

सुरुवाती समयमा केहि हतारिएको युभेन्टसले शक्तिशाली आक्रमण भने बुन्न सकेको थिएन । तर २२ औं मिनेटमा युभेन्टसले पेनाल्टीमार्फत अग्रता लिने अवसर पायो । स्टेफानो देन्स्विलले पेनाल्टी क्षेत्रभित्र म्याथिस डी लिग्टलाई तानेपछि रेफ्रीले भिडियो असिस्टेन्ट रेफ्रीको सहयोगले पेनाल्टी दिएका थिए ।

उक्त पेनाल्टीमा रोनाल्डोले गोल गर्दै सुरुवाती अग्रता दिलाए । रोनाल्डोको जारी लिग सिजनको यो २२ औं गोल हो । उनले गत सिजन गरेको २१ गोलको प्रदर्शनलाई लिगका ११ खेल बाँकी रहँदै सुधार गरेका छन् । रोनाल्डोले लगातार सातौं अवे खेलमा गोल गरेका हुन् ।

खेलको ३६ औं मिनेटमा पाउलो डिबालाले उत्कृष्ट गोल गर्दै युभेन्टसको अग्रता दोब्बर पारे । उनले फेडेरिको बर्नाडेस्कीको ब्याक फ्लिकमा आएको पासलाई पेनाल्टी क्षेत्र बाहिरबाट सुन्दर गोल गरे । ४० औं मिनेटमा रोनाल्डोको क्रसमा डिबालाले गरेको प्रहार पोस्टभन्दा थोरैले बाहिरियो ।

यस खेल जितेको खण्डमा युभेन्टसले दोस्रो स्थानको लाजियोभन्दा ४ अंकको अग्रता लिनेछ । हाल युभेन्ट्सको २६ खेलमा ६३ अंक छ भने लाजियो समान खेलमा ६२ अंकसहित पछ्याइरहेको छ । बोलोग्ना २६ खेलमा ३४ अंकसहित १० औं स्थानमा छ ।