एजेन्सी – स्पेनिस ला लिगा अन्तर्गत क्याटलान क्लब बार्सिलोनाले मंगलबार राती घरेलु मैदान क्याम्प नोउमा एथ्लेटिक बिल्बाओको सामना गर्दैछ । खेल नेपाली समयअनुसार रातको १:४५ (बुधबार विहान) बजे हुनेछ ।

लिगको ३० औं चरणको खेल सकिँदा रियल म्याड्रिड अंक तालिकाको शीर्षस्थानमा छ । अघिल्लो साता बार्सिलोना शीर्षस्थानमा रहेपनि सेभिल्लाविरुद्ध बराबरी खेलेपछि रियलले शीर्षस्थानमा उक्लने अवसर पाएको थियो । रियल म्याड्रिडले रियल सोसीडाडलाई पराजित गर्दै बार्सिलोनासँग अंक बराबर गर्न सफल रहयो ।

सिजन अवधिभर बार्सिलोना र रियल म्याड्रिड पालैपालो शीर्षस्थानमा पुगिरहेका छन् । बिल्बाओलाई पराजित गर्न सके बार्सिलोना अंक तालिकाको शीर्षस्थानमा पुग्ने छ । तर रियलले एक खेल कम खेलेको अवस्थामा टोलीलाई आफ्नो खेलमा जित हात पारे पुन: माथि पुग्ने अवसर हुनेछ । हेड टु हेडमा दुई टोलीको नतिजा हेर्दा रियल अगाडी रहेकाले अंक बराबरीको स्थिति बार्सिलोनालाई फाइदाजनक छैन ।

बिल्बाओ अंक तालिकाको नवौं स्थानमा छ । युरोपा लिगमा स्थान बनाउन कसरत गरिरहेको बिल्बाओ अनुकुल नतिजा आएको खण्डमा च्याम्पियन्स लिग स्थानसम्म पनि पुग्न सक्ने अवस्था रहेको छ । बिल्बाओ उच्च लयमा रहँदै पछिल्लो पाँच खेलमा अपराजित रहेको छ ।

बार्सिलोना र बिल्बाओबीच यसै सिजन भएको पहिलो खेलमा घरेलु टोलीले सान मामेसमा १-० को जित दर्ता गरेको थियो । उक्त खेलमा बिल्बाओका लेजेन्ड अरिट्ज अडुरिजले सानदार एक्रोब्याटिक गोल गर्दै जित दिलाएका थिए । अडुरिज चोटका कारण पुनरागमन गर्न नसक्दा बिल्बाओबाट बिदा भइसकेका छन् ।

बार्सिलोनाका लागि यस खेलमा मिडफिल्डर फ्रान्की डे जोङ चोटका कारण उपलब्ध हुने छैनन् । उनको स्थानमा आर्थरले मिडफिल्ड सम्हाल्ने सम्भावना रहेको छ । डिफेन्डर सर्जी रोबर्टो र विंगर ओस्मान डेम्बेले पनि चोटका कारण उपस्थित रहने छैनन् । पछिल्लो खेलमा सुरुवात गरेका मार्टिन ब्रेथवेट यस खेलमा बेन्चमा रहने सम्भावना रहेको छ ।

बार्सिलोना घरेलु मैदानमा भएको पछिल्लो २७ खेलमा अपराजित रहेको छ । बार्सिलोनाले पछिल्लोपटक २ वर्षअघि बेटिससँग ४-३ ले पराजित भएको थियो । बार्सिलोनाले बिल्बाओसँग घरेलु मैदानमा खेलेको पछिल्लो २२ खेलमा हार बेहोरेको छैन ।

बिल्बाओ पछिल्लो ५ खेलमा अपराजित रहने क्रममा ३ जित र २ बराबरीको नतिजा हासिल गरेको छ । बार्सिलोनाले बिल्बाओविरुद्ध खेलेको पछिल्लो तीन खेलमा गोल गर्न सकेको छैन । यता बार्सिलोना भने लगातार पछिल्लो ४ खेलमा क्लिन सिट राख्दै उच्च लयमा रहेको संकेत दिएको छ ।

बार्सिलोनाका कप्तान लिओनेल मेस्सीका लागि बिल्बाओ सबैभन्दा सहज टोलीमध्य एक रहेको छ । मेस्सीले बिल्बाओविरुद्ध मात्र २४ गोल र १० असिस्ट प्रदान गरेका छन् । मेस्सीले बिल्बाओविरुद्ध मात्र ३ पटक हार बेहोरेका छन् ।