काठमाडौं (हाम्रो खेलकुद)– अखिल नेपाल फुटबल संघ (एन्फा) ले आफु मातहतका सरोकारवालाई राहत उपलब्ध गराउन सुरु गरेको छ ।  फिफाको सहयोगमा एन्फाले कारोना भाइरस कोभिड १९ का कारण उत्पन्न कठिन परिस्थितिलाई मध्यनजर गर्दै राहत वितरणको निर्णय गरेको थियो ।

जसमा पहिलो चरणमा १३ जिल्ला र १२ क्लबले ७५ हजारका दरले मंगलबार रकम प्राप्त गरेको एन्फाले जनाएको छ । यसरी राहत लिने जिल्लामा सिरहा, बारा, महोत्ती, काभ्रे, चितवन, गोरखा, नवलपुर, बर्दिया, नवलपरासी, सुनसरी, सप्तरी, मकवानपुर र बागलुङ छन् ।

राहत लिने क्लबमा संकटा, थ्री स्टार, सरस्वती, मध्यपुर युथ एसोसियन, सातदोबाटो युथ, ब्वाइज युनियन, खुमलटार, श्री भगवती, खालीबारी युवा, वीरगन्ज युथ, मनहारा युनाइटेड र झापा फुटबल क्लब छन् । ७५ हजारका दरले मंगलबार एन्फाले १८ लाख ७५ हजार रुपैयाँ वितरण गरेको हो । एन्फाले प्रक्रिया पुरा गरेकार्लाइ राहत वितरण सुरु गरिएको र अन्यलाई पनि प्रक्रिया पुरा गर्न आग्रह गरेको छ ।

एन्फाले १ करोड रुपैयाँ भन्दा बढी राहतमा वितरण गर्दैछ । जसमा जिल्ला, क्लबसहित राष्ट्रिय खेलाडी, रेफ्री, प्रशिक्षक, कर्मचारी छन् । राहतको सिफारिसका लागि एन्फाले केन्द्रिय सदस्य रत्नकुमार श्रेष्ठ संयोजक रुपेश अधिकारी र उत्तमराज भण्डारी सदस्य रहेको राहत वितरण समिति गठन गरेको थियो ।

एन्फाले राष्ट्रिय महिला र पुरुष टोलीमा रहेका ३५/३५ खेलाडीलाई समान १५ हजारका दरले राहत दिने निर्णय गरेको थियो । जसलाई एन्फाले खुराक खर्च भनेको छ । एन्फाले आफु मातहतका ४८ जिल्ला, ए डिभजनका १४ क्लब, बी डिभिजनका १२ क्लब र सी डिभिजनका १४ क्लबलाई समान ७५ हजारको दरले राहत उपलब्ध गराउने भएको छ । एन्फाका ४ सदस्य समिति (प्रशिक्षक, खेलाडी, महिला र रेफ्री) लाई पनि समान रुपमा राहत वितरण गरिनेछ ।

त्यस्तै एन्फाबाट स्वीकृति मोफसलमा सञ्चालन गर्ने फुटबल प्रतियोगिता आयोजक क्लबलाई प्रति क्लब ७५ हजार रुपैयाँ दिने निर्णय भएको र त्यस्तो संंख्या झन्डै ३० वटा हुने एन्फा महासचिव इन्द्रमान तुलाधरले जनाकारी दिएका थिए । एन्फाले आफ्ना १ सय ५० कर्मचरी, शनिबारको प्रशिक्षण सञ्चालन गर्ने २४ प्रशिक्षक, ३० रेफ्री र रेफ्री एसेसरलाई जनही १० हजार रुपैयाँका दरले राहत प्रदान गरिने बताइएको थियो । फिफाले कोभिड १९ कै कारण निर्धारित समय अघि नै ५ लाख अमेरिकी डलर आफ्ना सदस्य राष्ट्रलाई पठाइसकेको छ ।

एन्फाले राहत दिने विस्तृत विवरण

– ४८ जिल्ला संघ प्रति जिल्ला ७५ हजार रुपैयाँ (कुल-३६ लाख रुपैयाँ)

– ४ सदस्य समिति, प्रति समिति ७५ हजार (कुल- ३ लाख रुपैयाँ)

– १४ ए डिभिजन क्लब, प्रति क्लब ७५ हजार रुपैयाँ (कुल – १० लाख ५५ हजार रुपैयाँ)

– १२ बी डिभिजन क्लब, प्रति क्लब ७५ हजार (कुल – ९ लाख रुपैयाँ)

– १४ सी डिभिजन क्लब, प्रति क्लब ७५ हजार (कुल – १० लाख ५० हजार रुपैयाँ)

– एन्फाबाट स्वीकृति मोफसलका ३० प्रतियोगिता आयोजन समिति, प्रति क्लब ७५ हजार (कुल – २२ लाख ५० हजार रुपैयाँ)

– शनिबारिय प्रशिक्षक २४, जनही १० हजार रुपैयाँ (कुल – २ लाख ४० हजार रुपैयाँ)

– एन्फा कर्मचरी १५०, जनही १० हजार रुपैयाँ (कुल – १५ लाख रुपैयाँ)

– रेफ्री/रेफ्री एसेसर ३० जना, जनही १० हजार (कुल- ३ लाख रुपैयाँ)

– राष्ट्रिय खेलाडी महिला/पुरुष ७० जना, जनही १५ हजार रुपैयाँ (कुल – १० लाख ५० हजार रुपैयाँ)

जम्मा राहत वितरण रकम – १ करोड २२ लाख ४० हजार रुपैयाँ