एजेन्सी – स्पेनिस ला लिगा अन्तर्गत बुधबार रियल म्याड्रिडले घरेलु मैदान अल्फ्रेडो डी स्टेफानो रंगशालामा मालोर्काको सामना गर्दैछ । खेल नेपाली समयानुसार बिहिबार बिहान १:४५ बजे सुरु हुनेछ ।

रियललाई लिगको शीर्षस्थानमा फर्कनका लागि मालोर्काविरुद्ध जितको विकल्प छैन । रेलिगेसन क्षेत्रमा रहेको मालोर्का कोरोना संक्रमणपछि खराब लयमा रहेको छ । यता रियलले भने लगातार जित दर्ता गर्दै लिग उपाधि होडमा पकड बनाएको छ । रियलले लिगका बाँकी सबै खेल जितेमा उपाधि कब्जा गर्नेछ ।

कोरोनाअघि रियलले दुई हार बेहोरेर खराब लयमा थियो । तर कोरोनापछिको लय र बार्सिलोनाले सेभिल्लाविरुद्ध बराबरी खेलेपछि रियल म्याड्रिड हेड टु हेडको आधारमा अंक तालिकाको शीर्षस्थानमा उक्लियो । सोसीडाडविरुद्ध जितमा रियलको प्रदर्शन अपेक्षित नरहेपनि ३ अंक हासिल गर्नु सुखद पक्ष थियो ।

रियलले कोरोनापछि खेलेका ३ खेलमा ८ गोल गरेको छ । जिदानले लिगको कमजोर मध्यको टोलीविरुद्ध केहि परिवर्तन गर्ने सम्भावना छ । यता मालोर्का भने रेलिगेसनबाट जोगिन रियलको मैदानबाट कम्तिमा एक अंक जोड्न चाहन्छ । रियलबाट लोनमा मालोर्का पुगेका जापानी विंगर टाकेफुसा कुबोले आफ्नो अभिभावक क्लबविरुद्ध बलियो प्रदर्शन गर्दै अर्को सिजन टोलीमा स्थान बनाउन प्रयास गर्नेछन् ।

रियलका लागि इडेन हाजार्डले खेल्ने नखेल्ने पक्का छैन । मिडफिल्डर इस्को प्रशिक्षणमा फर्किएसँगै टोलीमा समावेश हुने सम्भावना छ । क्यासेमिरो प्रतिबन्धमा रहेका कारण लुका मोड्रीचले मिडफिल्ड सम्हाल्न सक्छन् । डिफेन्डर तथा कप्तान सर्जियो रामोस पनि खेल्नेमा शंका रहेको छ ।