एजेन्सी – बार्सिलोनाका प्रशिक्षक किके सेटिनले मंगलबार एथ्लेटिक बिल्बाओविरुद्ध पहिलो पटक आफ्ना तीन स्टार फरवार्ड लिओनेल मेस्सी, लुइस सुआरेज र एन्टोइन ग्रिज्मनलाई पहिलो रोजाईमा खेलाए ।

कोरोना संक्रमणका कारण सिजन स्थगित हुनुअघि सेटिनले यी तीनलाई एकसाथ खेलाउन पाएकाथिएनन् । सेटिनले नियुक्ति पाउँदा फरवार्ड लुइस सुआरेज घुँडाको चोटका कारण विश्राममा थिए । मंगलबार बिल्बाओविरुद्ध तीनै खेलाडी एकसाथ सुरुवाती रोजाईमा परेपनि त्यसको नतिजा भने निराशाजनक रहयो ।

बिल्बाओविरुद्ध तीनै खेलाडीले गोल गर्न सकेनन् । कोरोनापछि टोलीमा पुनरागमन गरेका उरुग्वेका सुआरेजले हालसम्म गोल गर्न सकेका छैनन् । लगातार चौथो खेलमा गोलविहिन बनेका सुआरेज बिल्बाओविरुद्ध गोल गर्ने स्थितिनजिक पुगेपनि फिनिसिङमा भने चुकेका थिए ।

तीन खेलाडीमध्ये ग्रिजमनको अवस्था भने सबैभन्दा चिन्ताजनक रहेको छ । टोलीको खेल्ने शैलीमा भिजन नसकिरहेका ग्रिजमनले गोल गर्ने अवसर पाएका त थिए, तर गोलरक्षक उनाइ सिमोनले उनको प्रहार सहजै बचाए । लगातार औसत प्रदर्शनपछि उनलाई मनोबल बढाउन गोलको खाँचो रहेको छ ।

बिल्बाओविरुद्ध मेस्सीको पनि जादु चल्न सकेन । पछिल्लो चार खेलमा दुई गोल मात्र गर्न सकेका मेस्सीलाई आक्रमणमा उचित साथ मिलिरहेको देखिंदैन । मेस्सीका दुई गोलमध्य एक गोल पेनाल्टीबाट आएको थियो । मेस्सी ७ सयौं गोलको संघारमा पुगेपछि लगातार दुई खेल गोल गर्नबाट चुकेका छन् ।

लिग सुचारु हुनुअघि मेस्सी घाइते भएका थिए । पूर्ण रुपमा फिट नरहेको बताइरहंदा पनि मेस्सीले लिग सुचारु भएपछि पूरा समय मैदानमा बिताएका छन् । निकै आशा राखिएको एमएसजी चल्न नसक्दा बार्सिलोनाले लिगको शीर्षस्थानमा पकड समेत गुमाइसकेको छ ।