एजेन्सी – रियल म्याड्रिडका प्रशिक्षक जिनेदिन जिदानले टोलीका कप्तान सर्जियो रामोसको खुलेर प्रशंसा गरेका छन् । रियलले रियल मालोर्कालाई बुधबार २–० ले हराउँदा दोस्रो गोल रामोसले फ्रिकिकमा गरेका थिए ।

रामोसले झन्डै २० यार्ड टाढाबाट गरेको फ्रिकिक प्रहार वालको माथिबाट टप कर्नरमा गोल भएको थियो । उत्कृष्ट प्रदर्शन गरेका मालोर्काका कप्तान तथा गोलरक्षक रेइनाले समेेत त्यसलाई ठम्याउन सकेनन् ।

‘रामोस यस्तै अवसरको पर्खाइमा रहेका थिए । उनले प्रशिक्षणमा पनि फ्रिकिकको निकै अभ्यास गरेका हुन्छन् । उनले गोल गर्दा निकै खुसी लागेको छ,’ प्रशिक्षक जिदानले भने, ‘उनी हाम्रो नेता हुन् । कप्तान हुन् । उनले सधै यसरी नै टोलीको नेतृत्व गरिरहेका छन् ।’

बार्सिलोनाका रक्षक जेरार्ड पिकेको भनाईमा रामोसले प्रतिक्रिया दिए भने जिदान भने त्यसबाट बचे । ‘म यो सबै कुरामा पर्न चाहन्न,’ उनले भने, ‘रामोसले यो विषयमा बोलिसकेका छन् । मेरो आफ्नो नजर छ । हामीले आराम गर्नुपर्छ र अर्को खेलका बारेमा सोच्नु पर्छ ।’

प्रतिबन्धका कारण कासिमारो उपलब्ध नभएपछि जिदानले सबैलाई आश्चार्यमा पार्दै मालोर्काविरुद्ध ४ फरवार्ड खेलाएका थिए । ‘हामी नयाँ प्रयोग गरिरेहका हुन्छौं । हामीसँग थुप्रै खेलाडी छन् । यो पनि एउटा विकल्प हो । हामीले राम्रो खेल्यौं,’ उनले भने ।

‘अझै पनि केहि अभाव भइरहेको छ । त्यसैले सधै सुधारको आवश्यकता रहन्छ । यद्दपी म जितबाट खुसी छु । हामीलाई आराम चाहिएको छ । किन की अझै धेरै खेल खेल्न बाँकी छ । तर सबै टोलीका हकमा त्यो लागु हुन्छ । ‘

जिदानको टोली मालोर्कालाई जितेसँगै पुनः शीर्षस्थानमा उक्लेको छ । अन्तिम ७ चरणका खेल बाँकी रहँदा ला लिगाको उपाधि दौड रोचक बनेको छ । जिदानले भने, ‘अन्तिम सम्म पनि कठिन हुनेछ भन्नेमा म विश्वस्त छु ।’