एजेन्सी – इंग्लिस फुटबल लिगको पछिल्लो परिमार्जन प्रिमियर लिग सन् १९९२/९३ बाट सुरु भएको थियो । तर लामो समय लिभरपुलले प्रतिष्ठित उपाधि जित्न सकेन । अन्ततः तीन दशक लामो पर्खाईको अन्त्य भएको छ ।

२०१९/२० को प्रिमियर लिग च्याम्पियन लिभरपुल बनेको छ । पछिल्लो पटक लिभरपुलले १९८९/९० उपाधि जितेको थियो । नयाँ प्रणालीमा लिग सुरु तीन वर्षअघि लिभरपुल च्याम्पियन बनेको थियो ।

त्यसयता लिभरपुलले थुप्रै उपाधि जित्यो । तर लिग जित्न सकेन । टोलीले १९९२, २००१ र २००६ मा एफए कप जितेको थियो । त्यस्तै काराबाओ कप (१९९५,२००१,२००३ र २०१४) ४ पटक जितेको थियो । त्यस्तै लिभरपुलले एफए कम्युनिटी सिल्ड ( १९९०,२००१ र २००६) ३ पटक जितेको थियो ।

टोलीले २००५ र गत वर्ष च्याम्पियन्स लिग उपाधि जितेको थियो । त्यस्तै २००१ मा युइएएफए कप जितेको टोलीले २००१, २००५ र २०१९ मा युरोपियन सुपर कप र एक पटक क्लब विश्व कप जितेको थियो ।

९७ अंकका साथ उपविजेता

लिभरपुल पटक पटक लिग उपाधि नजिक पुगेर विमुख भएको थियो । गत वर्ष बाहेकमात्र पनि तीन पटक लिभरपुल लिग उपाधिको नजिक पुगेको थियो । २००१/०२,२००८/०९ र २०१३/१४ उपाधि जित्ने सम्भावना भएर पनि टोली सफल भएन । लिग च्याम्पियनका लागि गत सिजन पनि टोलीको सम्भावना राम्रो थियो तर सम्भव भएन ।

९७ अंक जोडेर पनि टोली उपविजेतामा सिमित भयो । युरोपका चर्चित ५ लिगका विजेताले पनि लिभरपुलको जति अंक बटुलेको थिएन । प्रिमियर लिगमा भने म्यानचेस्टर सिटी विजेता बनेको थियो । २००८/०९ मा म्यानचेस्टर युनाइटेडले ९० अंकका साथ उपाधि जितेको थियो । दोस्रो स्थानको लिभरपुलले ८६ अंक जोडेको थियो ।

लिभरपुलको उपाधि दौडमा सबै भन्दा निराशजनक भने सन् २०१३/१४ मा रह्यो । त्यति बेला ब्रेनडन रोजर्स टोलीको प्रशिक्षक थिए । लिभरपुल जोसे माउरिन्होको चेल्सीसँग घरेलु मैदानमा पराजित भएको थियो । पहिलो हाफमा कप्तान स्टेफन जेरार्ड चिप्लिएका कारण डेम्बा बाले गोल गरेका थिए । अर्को गोल विलियनले गरेका थिए । लिभरपुलको त्यहि हारका कारणले सिटीले त्यो वर्षको लिग जितेको थियो ।

तर, अहिले योर्गान क्लोपको प्रशिक्षणमा लिभरपुलले उपाधि जितेको छ । बिहीबार सिटीलाई चेल्सीले २–१ ले हराएपछि ७ खेल अघि नै लिभरपुलले उपा िजितेको छ । तीन दशकमा पटक पटक नजिक पुगेर पनि असफल भएको टोलीले क्लोपको नेतृत्वमा च्याम्पियन्स लिग उपाधि जितेको लिभरपुलले अन्ततः लिग उपाधि पनि हासिल गरेको छ ।