एजेन्सी – बार्सिलोनाका ब्राजिलियन मिडफिल्डर आर्थर मेलो र युभेन्टसका बोस्नियन मिडफिल्डर मिरालेम प्यानिचले सिजनको अन्त्यसँगै एक अर्कासँग क्लब परिवर्तन गर्ने लगभग पक्का भएको छ ।

दुवै पक्षका क्लब र खेलाडीबीच मौखिक सम्झौता भैसकेको छ । सिजनको अन्त्यपछि मात्र दुवै क्लबले औपचारिक रुपमा यसबारे घोषणा गर्ने बुझिएको छ । बार्सिलोनाले युवा मिडफिल्डर आर्थरको स्थानमा अनुभवी मिडफिल्डर प्यानिचलाई अनुबन्ध गर्ने खोजेको हो ।

युभेन्टसले साटफेर गर्दा १० मिलियन थप गर्नुपर्ने छ । तर समग्रमा भने यो ट्रान्सफरले युभेन्टसलाई बढी फाइदा हुने देखिन्छ । यस ट्रान्सफरका विभिन्न पक्ष र यसले कुन क्लबलाई कति फाइदा र बेफाइदा पुग्छ भन्ने मार्साले गरेको विश्लेषण यसप्रकार छ :

आर्थिक प्रभाव

कोरोनाका कारण दुवै क्लबमा आर्थिक समस्या भइरहेको छ । यसले गर्दा नयाँ खेलाडी अनुबन्ध गर्दा मोटो रकम खर्चन नसक्ने अवस्था रहेको थियो । बार्सिलोनालाई मिडफिल्डमा अनुभवी खेलाडी आवश्यक थियो भने युभेन्टस दीर्घकालीन योजनाका लागि मिडफिल्ड सुदृढ पार्न चाहन्थ्यो ।

आर्थिक हिसाबमा दुवै क्लबले आफ्नो लक्ष्य पनि प्राप्त गर्ने र बढी रकम पनि खर्च नहुने देखिएको छ । बार्सिलोनाले प्यानिचको अनुबन्धसँगै युभेन्टसबाट १० मिलियन युरो थप पाउनेछ । यता युभेन्टसले आफूले चाहेको खेलाडी कम मूल्यमा प्राप्त गर्नेछ । आर्थिक रिपमा दुवै क्लबलाई फाइदा हुने देखिन्छ ।

उमेर

उमेरको हिसाबमा भने बार्सिलोनालाई यस ट्रान्सफरले बेफाइदा हुनेछ । आर्थर भर्खर २३ वर्षका पुगे र आफ्नो उच्च लयमा आइरहेका छन् । यता प्यानिच भने ३० वर्षको पुगेर बिस्तारै करिअरको अन्त्यतर्फ लाग्नेछन् । प्यानिचले उच्च श्रेणीमा केहि वर्ष खेलेपछि बिदा हुनेछन् भने आर्थर अझै एक दशक खेल्न सक्नेछन् ।

प्रक्षेपण

खेलाडीहरु आउने वर्षमा कुन स्तरमा खेल्नेछन् भन्ने प्रक्षेपण उनीहरुको उमेरमा भर पर्नेछ । आर्थरले आफ्नो प्रदर्शन सुधार गर्दै आफूलाई विश्वस्तरीय खेलाडीका रुपमा उभ्याउन सक्छन् । यता प्यानिचले भने यसै स्तरलाई नियमित गर्न आफ्नो फिटनेसमा विशेष ध्यान दिनुपर्नेछ ।

चोटको समस्या

बार्सिलोनामा आएयता आर्थर लगातार चोटबाट जुधिरहेका छन् । उनी पछिल्लो २ सिजनमा ९ पटक घाइते भएका छन् । यसक्रममा उनले २२ खेल गुमाएका छन् । यसै अवधिमा भने प्यानिचले धेरै चोटको सामना गर्नुपरेको छैन । उनी दुई वर्षमा मात्र ३ पटक घाइते भएका छन् ।

बहुमुखी क्षमता

प्यानिचले आफ्नो करिअरको अधिकांश समय प्लेमेकरको भूमिका निर्वाह गरेका छन् । प्रशिक्षकको मागअनुसार उनले आफ्नो खेल्ने शैली परिवर्तन गर्दै आएका छन् । आर्थरले भने पोजिसन परिवर्तन गर्दा अपेक्षित प्रदर्शन गर्न सकेका छैनन् । युभेन्टसको आक्रमणमा पर्याप्त खेलाडी रहेकाले उनले आफ्नो चाहनाअनुसार मिडफिल्डमा नै खेल्न पाउनेछन् ।

रक्षात्मक रणनीति

आर्थरले पटक पटक बार्सिलोनाका लागि बक्स टु बक्सको भूमिका निर्वाह गरेका छन् । उनले रक्षात्मक मिडफिल्डरका रुपमा पनि खेल्न सक्छन् । यता प्यानिच भने प्राविधिक रुपमा निपुण रहेपनि  शारीरिक रुपमा आर्थरभन्दा रक्षात्मक रणनीतिमा कम प्रभावकारी हुनेछन् ।

टोलीको खेल्ने शैली

बार्सिलोनाको खेल्ने शैलीसँग मेल खाने खेलाडी हतपत भेटिदैनन् । प्यानिचको खेल्ने शैली हेर्दा उनलाई टोलीमा भिज्न धेरै समय लाग्ने देखिन्न । यता आर्थर पनि इटालियन फुटबलको माग र युभेन्ट्सको आवश्यकता अनुसार टोलीमा सहजी स्थान बनाउन सक्ने देखिन्छ ।

गोल

तथ्यांक हेर्दा दुवै खेलाडीको गोल संख्या उस्तै छ । तर प्यानिचको लामो दुरीबाट प्रहार गर्न सक्ने क्षमताले उनलाई राम्रो स्थानमा राख्छ । आर्थरले बार्सिलोनाको रणनीतिमा खेल्दा गोल गर्ने अवसर खासै पाएका छैनन् ।

फ्रिकिक

प्यानिच विश्व फुटबलमा फ्रिकिक प्रहार गर्ने उत्कृष्ट खेलाडीमा पर्छन् । तर बार्सिलोनामा मेस्सी रहेकाले उनले त्यस अवसर कमै मात्र पाउने देखिन्छ । आर्थरले पनि क्रिस्टियानो रोनाल्डो, पाउलो डिबाला लगायत खेलाडी हुँदा फ्रिकिकमा अवसर पाउने छैनन् ।