एजेन्सी – स्पेनिस ला लिगा अन्तर्गत शनिबार हुने खेलमा क्याटलान क्लब  बार्सिलोना फेरी एकपटक अंक तालिकाको शीर्षस्थानमा फर्कने लक्ष्यसाथ उत्रदैछ । खेल नेपाली समयअनुसार रातको ८:४५ बजे सुरु हुनेछ ।

लयमा रहेको सेल्टा भिगोको मैदानमा जित निकाल्दै बार्सिलोना शीर्षस्थानमा रहेको रियल म्याड्रिडमाथि दबाब कायम गर्ने सुरमा हुनेछ । लिग स्थगित हुनुअघि निकै खराब लयमा रहेको सेल्टालाई रेलिगेसनको डर समेत बढ्न थालेको थियो । तर लिग सुचारु भएपछि सकारात्मक नतिजा ल्याउँदै सेल्टा केहि ढुक्क अवस्थामा छ ।

लिग सुचारु भएलगत्तै भिल्लारियलसँग १-० ले पराजित भएको सेल्टाले त्यसपछि रियल भालाडोलिडसँग गोलरहित बराबरी खेलेको थियो । गत साता अलाभेसमाथि ६-० को सानदार जित दर्ता गरेको सेल्टाले रियल सोसीडाडलाई १-० ले हराउँदै अंक तालिकाको १६ औं स्थानमा उक्लेको छ ।

सेल्टाले घरेलु मैदानमा खेलेका १५ लिग खेलमध्ये ५ खेलमा मात्र हार बेहोरेको छ । यता बार्सिलोनाले भने घरेलु मैदानबाहिर खेलेका १५ मध्य ५ खेलमा मात्र जित दर्ता गर्न सकेको छ । सेल्टाविरुद्ध उसको मैदानमा बार्सिलोनाको पुरानो नतिजा पनि सुखद रहन सकेको छैन ।

बार्सिलोनाले पछिल्ला केहि खेलमा अपेक्षित प्रदर्शन गर्न सकेको छैन । पछिल्ला ५ मध्य ४ खेल जितेपनि शीर्षस्थानमा पकड गुमाउँदा टोलीको मनोबल कम भएको छ । सेभिल्लाविरुद्ध गोलरहित बराबरीमा रोकिएको बार्सिलोनाले पछिल्लो खेलमा एथ्लेटिक बिल्बाओविरुद्ध १-० को जित दर्ता गर्न निकै संघर्ष गर्नुपरेको थियो ।

सेल्टाविरुद्ध मिडफिल्डर सर्जियो बुस्केट्सको अनुपस्थितिले बार्सिलोनालाई समस्या पर्न सक्नेछ । उनको स्थानमा इभान राकीटिच र रिकी पुजमध्ये एकले सुरुवात गर्ने सम्भावना रहेको छ । ओस्मान डेम्बेले र फ्रान्की डे जोङ चोटका कारण यस खेलमा पनि उपस्थित रहने छैनन् ।

बार्सिलोनाले यसपछि एटलेटिको म्याड्रिडसंग खेल्ने हुनाले टोली छनोटमा पनि प्रशिक्षक किके सेटिनले सोच्नुपर्नेछ । आक्रमणमा लिओनेल मेस्सीलाई साथ दिन एन्टोइन ग्रिजमन र लुइस सुआरेजमा एक जना मात्र पहिलो रोजाईमा पर्ने सम्भावना रहेको छ ।