एजेन्सी – स्पेनिस ला लिगा अन्तर्गत शनिबारको खेलमा क्याटलान क्लब बार्सिलोना सेल्टा भिगोको मैदानमा बराबरीमा रोकिएको छ । दुई पटक अग्रता लिएर पनि २-२ को बराबरीमा रोकिएको बार्सिलोना अंक तालिकाको शीर्षस्थानमा भने उक्लिएको छ ।

खेलको २० औं मिनेटमा बार्सिलोनाले सुआरेजको गोलमा सुरुवाती अग्रता लिएको थियो । कप्तान मेस्सीले झन्डै २२ यार्ड टाढाबाट प्रहार गरेको फ्रिकिकमा सुआरेजले ६ यार्ड बक्स अगाडीबाट हेडरमार्फत गोल गरेका थिए ।

बार्सिलोनाले अग्रता लिएको ५ मिनेट नबित्दै सेल्टाले बराबरी गर्ने सुवर्ण अवसरको सदुपयोग गर्न सकेन । ब्राइस मेन्डेजको पासमा इआगो आस्पासको प्रहार गोलरक्षक मार्क आन्दर टेर स्टेगनलाई लाग्दै पोस्टमा लागेर फर्केको थियो । रिबाउन्डमा आएको बललाई नेल्सन सेमेडोले क्लियर गर्दै खतरा टारे ।

दोस्रो हाफको सुरुवाती समयमा नै घरेलु टोलीले स्कोर बराबर गर्यो । ५० औं मिनेटमा फेडोर स्मोलोभले गोल गर्दै सेल्टालाई खेलमा फर्काएका थिए । ओके योकुस्लुले जेरार्ड पिकेको चुनौती पार गर्दै दिएको पासमा अनमार्क रहेका स्मोलोभले सहजै गोल गरेका थिए ।

५२ औं मिनेटमा पेनाल्टी क्षेत्रभित्र फल भएको आशंकामा रेफ्रील भिडियो असिस्टेन्ट रेफ्री (भीएआर) को सहायता लिएपनि निर्णयमा पेनाल्टी दिइएन । ५५ औं मिनेटमा सुआरेजको पासमा मेस्सीको प्रहारले पोस्टको दिशा लिन सकेन ।

६७ औं मिनेटमा सुआरेजले व्यक्तिगत दोस्रो गोल गर्दै बार्सिलोनालाई पुन: अग्रता दिलाए । मेस्सीले पेनाल्टी क्षेत्रभित्र दिएको पासलाई सुआरेजले डिफेन्सको दबाब चिर्दै उत्कृष्ट टर्नमा गरेको प्रहार गोलमा परिणत भएको थियो ।

नियमित समयको तीन मिनेट बाँकी रहँदा सेल्टाले पुन: खेल बराबरीमा ल्यायो । सेल्टाका कप्तान इयागो आस्पासले पेनाल्टी क्षेत्रको ठिक बाहिर प्राप्त फ्रिकिकलाई सिधै गोलमा परिणत गर्दै खेल २-२ को बराबरीमा ल्याएका थिए । इन्ज्युरी समयमा नोलिटोले सहज अवसरमा गोल गर्न नसक्दा बार्सिलोना हारबाट जोगियो ।

यस बराबरीसँगै बार्सिलोना अंक तालिकाको शीर्षस्थानमा उक्लिएको छ । बार्सिलोनाको ३२ खेलमा ६९ अंक रहेको छ । दोस्रो स्थानको रियल म्याड्रिडको ३१ खेलमा ६८ अंक छ । रियल म्याड्रिडले आइतबार हुने खेलमा एस्पान्योलको सामना गर्नेछ ।

एस्पान्योललाई पराजित गरेमा रियल म्याड्रिडले २ अंकको अग्रता लिनेछ । सेल्टा भने ३२ खेलमा ३४ अंक जोड्दै १६ औं स्थानमा यथावत छ ।