एजेन्सी – टाइब्रेकर पुग्नुभन्दा २ मिनेटअघि डिफेन्डर ह्यारी मगाएरले गोल गरेपछि म्यानचेस्टर युनाइटेडले एफए कपको क्वाटरफाइनलमा नर्विच सिटीलाई २-१ ले पराजित गरेको छ ।

निर्धारित ९० मिनेटको खेल १-१ को बराबरीमा टुंगिएपछि खेल अतिरिक्त समयमा धकेलिएको थियो । अतिरिक्त समयको दुवै हाफमा युनाइटेडले एकतर्फी आक्रमण गरेपनि नर्विचले लगातार रक्षात्मक खेल प्रस्तुत गर्दै खेल टाइब्रेकरतर्फ धकेल्न खोजेको थियो । तर २ मिनेट समय बाँकी रहँदा मगाएरले गोल गर्दै युनाइटेडको सेमिफाइनल टिकट काटे ।

खेलको ५१ औं मिनेटमा युनाइटेडले ओडीअन इघालोको गोलमा अग्रता लिएको थियो । उनले आउटसाइड बुटले गरेको फ्लिकमा गोलरक्षक टिम क्रुललाई बिट गरेका थिए । ७५ औं मिनेटमा टड कान्टवेलले गोल गर्दै खेल बराबरीमा ल्याए । उनले झन्डै २५ यार्ड टाढाबाट गरेको प्रहार युनाइटेडका गोलरक्षक सर्जियो रोमेरोले बचाउन सकेनन् ।

खेलको ८९ औं मिनेटमा नर्विच १० खेलाडीमा सिमित भएपछि युनाइटेडलाई फाइदा पुगेको थियो । पेनाल्टी क्षेत्रको ठिक बाहिर टिम क्लोजले इघालोलाई बलसम्म पुग्नबाट समातेपछि रेफ्रीले उनलाई रातो कार्ड दिएका थिए ।

१० खेलाडीमा सिमित नर्विचमाथि युनाइटेडले लगातार आक्रमण गरेपनि गोलरक्षक क्रुल त्यसमा बाधक बनिरहे । उनले निर्धारित समयको अन्तिम मिनेटमा मेसन ग्रिनवुडको प्रहार विफल पार्दा अतिरिक्त ३० मिनेट समयमा आधा दर्जन गोलको अवसर विफल पारे । तर १ सय १८ औं मिनेटमा नर्विचका तीन डिफेन्डरको बीचबाट मगाएरले भिडभाडको अवस्थामा गरेको प्रहार गोलमा परिणत भएपछि नर्विच क्वाटरफाइनलबाट बाहिरियो ।