एजेन्सी – बार्सिलोना फरवार्ड लुइस सुआरेजले सेल्टा भिगोसँग बराबरी खेलेपछि नाजित्नुको कारण प्रशिक्षक किके सेटिन र उनको प्रशिक्षण टोलीलाई थाहा भएको बताएका छन् ।

सुआरेजले बार्सिलोनालाई दुई पटक अग्रता दिलाएपनि अन्त्यमा सेल्टाको मैदानबाट एक अंक मात्र जोड्न सकेको थियो । गत शुक्रबार मात्र सेभिल्लासँग बराबरी खेलेको बार्सिलोनाले फेरी एकपटक जित दर्ता गर्न सकेन । सेभिल्लासँगको खेलअघि बार्सिलोना लिगको शीर्षस्थानमा रहेको थियो ।

बार्सिलोनाले सेभिल्लाविरुद्ध बराबरी खेलेपछि रियलले शीर्षस्थानमा जाने अवसर पाएको थियो । हेड टु हेडमा अगाडी रहेको रियल अंक बराबर भएपनि बार्सिलोनाभन्दा अगाडी छ । सेल्टासँग बराबरी खेलेपछि भने अब रियलले स्पष्ट २ अंकको अग्रता लिने अवसर पाएको छ ।

खेलपछि पत्रकार सम्मेलनमा बोल्दै सुआरेजले घरेलु मैदानबाहिर जित्न नसक्नुको कारणबारे सोध्दा प्रशिक्षक सेटिन र उनको टोलीलाई यसको उत्तर थाहा रहेको बताए ।

‘ मलाई यसबारे सोध्नुभन्दा प्रशिक्षकलाई सोध्नु राम्रो हुन्छ । वहाँहरुले यसबारे अध्ययन गरेर बस्नुभएको छ,’ सुआरेजले भने, ‘ अघिल्ला सिजनमा हामीले यस्तो खेल जितेर नै उपाधिसम्म पुगेका थियौं ।’

सुआरेजले चोटका बाबजुद पनि जारी सिजन गोलसंख्या १३ पुर्याएका छन् । सेल्टाको मैदानमा शनिबार दुई गोल गरेका सुआरेजलाई दुवै गोलमा मेस्सीले असिस्ट गरेका थिए । यसपटक भने उनी खेललाई लिएर नकारात्मक भावना विकास भइरहेको बताउँछन् ।

‘हामी किन हो नकारात्मक भावना लिएर खेलमा गइरहेका छौं जस्तो लाग्छ । हामीले दुई महत्त्वपूर्ण अंक गुमाएको छौं । अहिलेको अवस्थामा हामीले सबै खेल जितेर अझ रियलले अंक गुमाउनु पर्ने अवस्था थियो । म निकै निराश छु,’ उनले भने ।

रियलले आइतबारको खेलमा एस्पान्योलको सामना गर्दैछ । एस्पान्योलले भर्खर मात्र आफ्नो प्रशिक्षक बर्खास्त गरेर सुखद नतिजाको अपेक्षा गरिरहेको छ । रियललाई शीर्षस्थानमा उक्लन कम्तिमा बराबरीको आवश्यकता रहनेछ ।