एजेन्सी – स्पेनिस ला लिगा अन्तर्गत रियल म्याड्रिडले आइतबार राति एस्पान्योलको सामना गर्दैछ । खेल नेपाली समयानुसार सोमबार विहान १:४५ बजे सुरु हुनेछ ।

एस्पान्योलको मैदानमा रियल म्याड्रिड लगातार पाँचौ जित दर्ता गर्ने लक्ष्यसहित मैदानमा उत्रनेछ । शनिबार बार्सिलोनाले सेल्टा भिगोको मैदानमा जित हासिल गर्न नसक्दा रियललाई फाइदा पुगेको छ ।

दुई साता अघिसम्म अंक तालिकाको दोस्रो स्थानमा रहेको रियल पछिल्लो साता अंक बराबर भएपछि हेड टु हेडको आधारमा अगाडी पुग्यो । अब रियललाई स्पष्ट अग्रता लिने अवसर जुरेको छ ।

रियलले कोरोनापछि लिगमा खेलेको चार खेलमा लगातार जित दर्ता गर्दै उपाधि लक्ष्यलाई सुदृधढ पारेको छ । एइबार, भ्यालेन्सिया, सोसीडाड र मालोर्काविरुद्ध जितले रियलको टोली उच्च मनोबलमा छ ।

रियलले लिगका ३१ खेल मध्ये ३ खेलमा मात्र हार बेहोरेको छ । यसका साथै टोलीले लिगमा सर्वोत्कृष्ट डिफेन्सको समेत साथ पाएको छ । लिग अवधिभर मात्र २१ गोल खाएको टोलीमा गोलरक्षक थिबाउट कोर्टुवा र सर्जियो रामोसले विशेष प्रदर्शन गर्दै आएका छन् ।

बार्सिलोनाका तुलनामा सहज खेल बाँकी रहेकाले पनि रियलले यस खेल जित्दै अग्रता लिए उपाधि दावेदारीमा बलियो प्रस्तुति हुनेछ । एस्पान्योलविरुद्ध रियलले पछिल्ला ३ खेलमा नै जित हासिल गरेको छ । २०१७-१८ सिजनमा भने रियल १-० ले पराजित भएको थियो ।

एस्पान्योल अझै पनि रेलिगेसन क्षेत्रबाट ८ अंक पछाडी छ । लिगको ७ खेल मात्र बाँकी रहेको अवस्थामा एस्पान्योललाई अर्को सिजन ला लिगामै रहन आजसहित अन्य खेलमा सकारात्मक नतिजा आवश्यक छ । २६ वर्षदेखि लगातार शीर्ष श्रेणीमा खेलिरहेको एस्पान्योल रेलिगेसनको संघारमा छ ।

३१ खेलमा टोलीले मात्र २४ अंक जोड्न सकेको छ । हालसम्म लिगमा जम्मा ५ खेल जितेको एस्पान्योलले ९ खेल बराबरी गरेको छ ।

पछिल्लो दुई खेल लेभान्ते र रियल बेटिससँग हारले टोली थप समस्यामा परेको छ । अझ एस्पान्योलले यसपछि रियल सोसीडाड र बार्सिलोनाको सामना गर्न बाँकी छ ।

एस्पान्योलका लागि यस खेलमा सबास्टियान कोर्सिया चोटमुक्त भएर छनोटका लागि उपलब्ध रहनेछन् । लिओनार्डो कार्बेरा र बर्नार्डो एस्पिनोजा पनि निलम्बनबाट फुकुवा भएर मैदान फर्कनेछन् । फरवार्ड वे ली, राउल डे टोमस र ओस्कार मेलेन्दो टोलीमा फर्कने सम्भावना रहेको छ ।

रियलका लागि मिडफिल्डर क्यासेमिरो निलम्बनबाट फिर्ता हुँदा ब्राजिलियन डिफेन्डर मार्सेलो पनि पहिलो रोजाईमा फर्कनेछन् । मिडफिल्डर लुका मोड्रीच र डिफेन्डर फर्लान्ड मेन्डी यस खेलका लागि निलम्बित छन् । पछिल्लो खेलमा अपेक्षित प्रदर्शन गर्न नसकेका ग्यारेथ बेलले बेन्चमा चित्त बुझाउनु पर्नेछ ।