एजेन्सी – क्याटलान क्लब बार्सिलोनाका लागि पछिल्लो केहि साता सुखद रहन सकेको छैन । कोरोनाका कारण लिग स्थगित हुँदा शीर्षस्थानमा रहेको बार्सिलोना अहिले रियल म्याड्रिडभन्दा २ अंकले पछाडी रहेको छ ।

सिजनको बीचमा किके सेटिनलाई नियुक्ति दिएपछि सिजन सम्हालिने सम्भावना देखिएको थियो । तर पछिल्ला केहि खेलमा अपेक्षित नतिजा आउन नसकेपछि प्रशिक्षक सेटिन र बार्सिलोना हालसम्मकै कठिन समयबाट गुज्रिरहेका छन् । खेलाडीसँग पनि सेटिनको सम्बन्ध बिग्रदै गएको छ ।

६१ वर्षीय सेटिनको नियुक्ति नै कतिपय बार्सिलोनाका खेलाडीलाई चित्त बुझेको थिएन । तर लगातार राम्रो नतिजा आउँदा सम्बन्ध सुध्रंदै गएको बुझिएको थियो । पछिल्ला खेलमा खेलाडी छनोटमा पनि प्रशिक्षक सेटिनले उचित निर्णय लिन नसक्दा खेलाडीहरु रुष्ट भएको क्लबनिकट स्रोतले जनाएको छ ।

शनिबारको खेलमा बार्सिलोना सेल्टा भिगोको मैदानमा २-२ को बराबरीमा रोकिएपछि खेलाडी र प्रशिक्षकबीच ड्रेसिङ रुममा वादविवाद नै भएको बुझिएको छ । त्यसैले पनि फरवार्ड लुइस सुआरेजले सेल्टाविरुद्ध खेलपछि पत्रकारसँग बोल्ने क्रममा सेटिन र उनको प्रशिक्षण टोलीबारे अभिव्यक्ति दिएका थिए । उक्त खेलमा सुआरेजले २ गोल गरेका थिए ।

‘ मलाई यसबारे सोध्नुभन्दा प्रशिक्षकलाई सोध्नु राम्रो हुन्छ । वहाँहरुले यसबारे अध्ययन गरेर बस्नुभएको छ,’ सुआरेजले भनेका थिए, ‘ अघिल्ला सिजनमा हामीले यस्तो खेल जितेर नै उपाधिसम्म पुगेका थियौं ।’

सुआरेजले चोटका बाबजुद पनि जारी सिजन गोलसंख्या १३ पुर्याएका छन् । सेल्टाको मैदानमा शनिबार दुई गोल गरेका सुआरेजलाई दुवै गोलमा मेस्सीले असिस्ट गरेका थिए । यसपटक भने उनी खेललाई लिएर नकारात्मक भावना विकास भइरहेको बताउँछन् ।

‘हामी किन हो नकारात्मक भावना लिएर खेलमा गइरहेका छौं जस्तो लाग्छ । हामीले दुई महत्त्वपूर्ण अंक गुमाएको छौं । अहिलेको अवस्थामा हामीले सबै खेल जितेर अझ रियलले अंक गुमाउनु पर्ने अवस्था थियो । म निकै निराश छु,’ उनले भने ।

सेल्टाविरुद्ध खेलाडीहरुले प्रशिक्षक सेटिनले गरेको खेलाडी परिवर्तनलाई लिएर विवाद गरेको बुझिएको छ । विशेषगरी लयमा नरहेका एन्टोइन ग्रिजमन र क्लब छाड्ने तयारीमा रहेका मिडफिल्डर आर्थर मेलोलाई मैदान छिराउनु गलत निर्णय लिएको खेलाडीहरुको भनाइ थियो ।

खेलाडीहरुले अहिलेको प्रशिक्षण टोलीको खेलाउने शैलीमा नै प्रश्न उठाएका छन् । खेलाडीहरुले यहि लयमा खेल्ने हो भने क्लबले कुनै पनि ट्रफी नजिती सिजन टुंग्याउने डर रहेको बुझेका छन् । त्यसैले पनि खेलाडीहरु सार्वजनिक रुपमा नै प्रशिक्षकको आलोचना गर्न थालेका हुन् ।