काठमाडौं (हाम्रो खेलकुद)– राष्ट्रिय फुटबल खेलाडी जर्ज प्रिन्स कार्की नेपाली सेनाको सह सेनानी (क्याप्टेन) मा बढुवा भएका छन् । २०७२ सालमा सेनामा आबद्ध भएका प्रिन्सलाई सोमबार नम्बर २ राजदल गण सुर्खेतका गणपति राजेशप्रसाद खत्रीले दर्ज्यानी चिन्ह प्रदान गरेका थिए ।

सेनासँगै खेलाडी हुन सहज नभएको उल्लेख गर्दै प्रिन्सले सफलता मिलेपछि भने गर्व महसुस हुने बताए । उनले भने, ‘यस्तो सफलताले थप हौसला मिल्छ । देश र समाजका लागि केहि गर्न पाएको महसुस हुन्छ । परिवारले गर्व महसुस गर्छ । यस्तोले अझै राम्रो गर्ने प्रेरणा मिल्छ ।’

काभ्रे ,धुलिखेल नगरपालिका शंखुमा जन्मिएका प्रिन्सले सेनामा प्रवेश गर्नुअघि २०६९ मा सी डिभिजन छनोट हुने गृह बनेपा ब्वाइज क्लब (बिबिसी) खेलेका थिए । अर्को बर्ष फ्रेन्ड्स क्लबका लागि ए डिभिजन खेलेका प्रिन्सको त्यसपछिको यात्रा भने सेना तिर मोडियो ।

२५ वर्षिय प्रिन्स मंसिरमा सेनाको सकेन्ड लेफ्टिनेन्टमा पास आउट भए । आफ्नो ब्याचको टपर रहेका उनले एक वर्ष भारतमा रहेर प्रशिक्षण पनि गरे । भारतीय सेनाको एकेडेमीमा रहँदा उनले फुटबल प्रशिक्षण लिने मौका पाए । नेपाल फर्केपछि उनलाई क्लबका प्रशिक्षक नवीन न्यौपानेले सोझै सिनियर टोलीमा समेटेका थिए ।

राष्ट्रिय टोलीमा जापानी प्रशिक्षक ग्योतोकु कोजी प्रशिक्षक रहँदा उनले घरेलु मैदानमा विश्वकप छनोट अन्तर्गत ताजिकिस्तानविरुद्ध खेलमा सिनियर टोलीबाट डेब्यु गरेका थिए । उनले पछिल्लो समय भने सेनाको तालिममा सहभागी हुनुपर्ने भएपछि बन्द प्रशिक्षणमा सहभागी भएका थिएनन् ।

प्रिन्स केहि समय अघि सेनाबाट ६ महिनाको प्रशिक्षणका लागि बंगलादेश गएका थिए । त्यहाँबाट फर्केपछि उनले ए डिभिजन लिगमा आर्मीको जर्सी पनि पहिरिए । आर्मीले लिगको अन्तिम खेलमा मछिन्द्रसँग पराजित हुँदै पहिलो पटक ए डिभिजन लिग जित्ने अवसर गुमाएको थियो । प्रिन्सले सरस्वतिविरुद्ध खेलमा आर्मीको जितमा निर्णायक गोल गरेका थिए । उनले लिगमा आर्मीले खेलेको सबै १३ खेलमा सहभागिता जनाएका थिए ।

प्रिन्स आक्रमणको कुनैपनि स्थानमा खेल्ने क्षमता राख्दछन् । आर्मीको आक्रमणमा नवयुग श्रेष्ठ र भरत खवाससँग खेल्ने उनले सेन्टर फरवार्ड र राइट विंगका रुपमा बढी खेलेका छन् । फ्रिकिक प्रहारमा माहिर प्रिन्सको बलियो पक्ष तीव्र गती र शक्तिशाली प्रहार हो ।

प्रिन्स यसपटक भने विश्वकप छनोटका लागि घोषणा भएको राष्ट्रिय टोलीको बन्द प्रशिक्षणमा बोलाइएका छन् । लकडाउनका कारण प्रशिक्षण स्थगित भएपछि उनी हाल सेनाको ड्युटीमा व्यस्त छन् । राष्ट्रिय टोलीको प्रशिक्षण सुचारु हुने भएपछि राजधानी फर्कने प्रिन्सले बताएका छन् ।

नेपालले असोजमा हुने विश्वकप छनोटको खेलमा अष्ट्रेलिया र चाइनिज ताइपेइसँग दशरथ रंगशालामा खेल्नेछ । नयाँ खेल तालिका अनुसार नेपालले असोज २२ (८ अक्टोबर)मा चाइनिज ताइपेइसँग खेल्नेछ भने अष्ट्रेलियासँग त्यसको पाँच दिन पछि (असोज २७ गते) प्रतिस्पर्धा गर्नेछ । २७ कार्तिक (१२ नोभेम्बर)मा जोर्डनसँग खेल्दै नेपालले आफ्नो विश्वकप छनोट सम्पन्न गर्नेछ ।