काठमाडौं (हाम्रो खेलकुद)– राष्ट्रिय फुटबल टोलीले खेल्ने क्षेत्रिय स्तरको प्रतिष्ठित साफ च्याम्पियनसिपको अर्को संस्करण एक वर्ष (सन् २०२१) पछि धकेलिएको छ । कोरोना भाइरस कोभिड १९ का कारण खेलकुदका अधिकांश प्रतियोगितामा असर पर्दा साफ च्याम्पियनसि पनि अर्को वर्ष मात्र आयोजना हुने भएको हो । साफ च्याम्पियनसिप यो वर्ष हुने पर्ने थियो । 

दक्षिण एसियाली फुटबल महासंघ (साफ) ले सदस्य सात राष्ट्र नेपाल, भारत, पाकिस्तान, बंगलादेश, श्रीलंका, माल्दिभ्स र भुटानका फुटबल संघका महासचिवसँग सोमबार जुम मार्फत गरेको छलफलपछि साफ अर्को वर्ष आयोजना गर्ने निर्णय गरेको हो ।

बैठक मुख्यतः साफ च्याम्पियनसिपसहित, साफ महिला/पुरुष यू १५ र साफ यू १८ महिला च्याम्पियनसिपका विषयमा छलफल गर्न बैठक बसेको अखिल नेपाल फुटबल संघ (एन्फा) ले जनाएको छ ।

साफका महासचिव अनवारुल हकले सहभागी फुटबल संघका महासचिवलाई स्वागत गरेका थिए । एन्फाका महासचिव इन्द्रमान तुलाधरले बैठकमा भाग लिएका थिए । उमूह समूहका प्रतियोगिताका विषयमा भने अर्को बैठकमा छलफल हुने बताइएको छ ।

सिनियर टोलीले खेल्ने एक मात्र प्रतियोगिता साफ च्याम्पियनसिप नेपाल अहिले सम्म जित्न सकेको छैन । अधिकांश पटक दाबेदारको रुपमा हेरिने गरेको नेपाल अहिले सम्म फाइनल पुग्न सकेको छैन । यसअघि बंगलादेशमा भएको संस्करणमा पनि नेपाली टोली सेमिफाइनलमा माल्दिभ्ससँग पराजित भएको थियो । माल्दिभ्सले नै त्यो संस्करण जितेको थियो ।