एजेन्सी – स्पेनिस ला लिगा अन्तर्गत मंगलबारको खेलमा साविक विजेता क्याटलान क्लब बार्सिलोनाले घरेलु मैदान क्याम्प नोउमा एटलेटिको म्याड्रिडको सामना गर्दैछ । खेल नेपाली समयअनुसार बुधबार विहान १:४५ बजे सुरु हुनेछ ।

बार्सिलोना पछिल्लो तीन खेलमा दुई बराबरी खेल्दै उपाधि होडमा रियल म्याड्रिडभन्दा पछाडी परेको छ । कोरोना संक्रमणको समयमा लिगको शीर्षस्थानमा रहेको बार्सिलोना हाल भने रियलभन्दा २ अंक पछाडी रहेको छ ।

सेभिल्लासँग बराबरीपछि शीर्षस्थानमा पकड गुमाएको बार्सिलोना हेड टु हेडमा पछाडी परेको थियो । तर सेल्टा भिगोसँग २-२ को बराबरीले रियल म्याड्रिडले अग्रता लिने अवसर पाएको थियो । आफ्नो खेलमा पुछारको एस्पान्योललाई हराउँदै रियलले बार्सिलोनासँग २ अंकको अग्रता लियो ।

यता कोरोना संक्रमणपछि रियलको छिमेकि टोली एटलेटिको म्याड्रिडले पनि लगातार चार जित हासिल गरेको छ । पहिलो खेलमा एथ्लेटिक बिल्बाओसँग १-१ को बराबरीमा रोकिएपनि त्यसपछि भने डिएगो सिमिओनीले लगातार जित हासिल गर्दै आएको छ । एटलेटिकोले ओसासुना, रियल भालाडोलिड, लेभान्ते र अलाभेसलाई पराजित गरेको हो ।

एटलेटिको पछिल्लो नतिजाले लिग तालिकाको तेस्रो स्थानमा उक्लेको छ । चौथो स्थानको सेभिल्लाभन्दा एटलेटिको ४ अंक अगाडी छ भने पाँचौ स्थानको भिल्लारियलभन्दा ७ अंक अगाडी छ । लकडाउनअघि शीर्ष ४ मा पुग्ने शंका रहेपनि पछिल्लो नतिजाले भने एटलेटिकोको युरोपको टिकट पक्का भएको छ ।

जारी सिजन एटलेटिकोले जम्मा ४ खेलमा पराजय भोगेको छ । लिगमा रियलले भोगेको ३ हार नै उत्कृष्ट नतिजा हो । लिगमा १३ खेल बराबरी खेल्दा एटलेटिकोले धेरै अंक गुमाएको छ । एटलेटिकोले लिगको ३२ खेलमा जम्मा २३ गोल खाएको छ । तर आक्रमणमा मात्र ४१ गोल गर्नुले एटलेटिकोको समस्या बल्झेको हो ।

बार्सिलोनाले पछिल्लो खेलमा दुई पटक अग्रता लिएपनि जित हासिल गर्न सकेन । बार्सिलोनाले कोरोनापछि लिग सुचारु हुँदा मालोर्का र लेगानेसलाई पराजित गरेपनि त्यसपछि तीन खेलमा भने एक जित मात्र हासिल गरेको छ । बार्सिलोनाले यस खेलमा जित हासिल गर्न नसके रियल म्याड्रिड उपाधि होडमा सुदृढ अवस्थामा हुनेछ ।

सेल्टाविरुद्ध खेलपछि बार्सिलोनाका प्रशिक्षक र खेलाडीबीच विवाद भएको घटनाले चर्चा बटुलेको थियो । खेलाडी परिवर्तन गर्ने निर्णयलाई लिएर खेलाडीहरु नै सन्तुष्ट नभएको बुझिएको छ । लिग उपाधि रक्षा गर्ने लक्ष्यमा पछाडी परेको बार्सिलोनाले लगातार टोलीमा परिवर्तन गर्दा पनि प्रदर्शन खस्केको आंकलन गरिएको छ ।