एजेन्सी – इटालियन सिरी ए अन्तर्गत लिगको शीर्षस्थानमा रहेको युभेन्टसले मंगलबार रेलिगेसन क्षेत्र नजिक रहेको जेनोआको सामना गर्दैछ । खेल नेपाली समयअनुसार बुधबार विहान १:३० बजे सुरु हुनेछ ।

युभेन्टस लिगमा लगातार छैटौं जित दर्ता गर्ने लक्ष्यसहित मैदानमा उत्रनेछ । युभेन्टस दोस्रो स्थानको लाजियोभन्दा ४ अंकले अगाडी छ । यता जेनोआ भने लिगको १७ औं स्थानमा रहेको छ । रेलिगेसन क्षेत्रभन्दा १ अंक माथि रहेको जेनोआ घरेलु मैदानमा साविक विजेताविरुद्ध कम्तिमा १ अंक जोड्न चाहन्छ ।

सन् २००६-०७ सिजनदेखि लगातार शीर्ष श्रेणीमा खेल्दै आएको जेनोआ यसपटक घटुवा हुने खतरामा छ । गत सिजन १७ औं स्थानमा रहँदै रेलिगेसन टारेपनि यस सिजन प्रदर्शन सुध्रन सकेको छैन । जेनोआले लिगको २८ खेलमध्ये ६ खेलमा मात्र जिद दर्ता गरेको छ । २६ जम्मा २६ अंक जोडेको टोली १८ औं स्थानको लेच्चेभन्दा १ अंक माथि छ ।

जेनोआले पछिल्ला केहि खेलमा भने सुखद संकेत दिएको छ । पछिल्लो ८ खेलमा २ मात्र हार बेहोरेको जेनोआले यसक्रममा काग्लियारी, बोलोग्ना र एसी मिलानलाई पराजित गरेको थियो । पछिल्लो खेलमा ब्रेसियासँग २-२ को बराबरीले भने टोलीलाई केहि असर परेको छ ।

युभेन्टसले कोरोना संक्रमणबाट लिग सुचारु भएपछि दुवै खेलमा जित दर्ता गरेको छ । कोप्पा इटालियामा अपेक्षित नतिजा नआएपनि युभेन्टसले लिगमा भने आफ्नो अग्रता बढाउने अवसरलाई सदुपयोग गरेको छ । बोलोग्नामाथि २-० को जित दर्ता गरेको युभेन्टसले त्यसपछिको खेलमा लेच्चेलाई ४-० ले पराजित गरेको थियो ।

पछिल्लो पाँच लिग खेलमा जित हासिल गरेको युभेन्टस हाल लाजियोभन्दा ४ अंकले अगाडी छ । तर लाजियोले यस खेलअघि टोरिनोको सामना गर्नेछ । त्यस नतिजाले पनि युभेन्टसको मनोबलमा असर पर्नेछ । जेनोआले गत सिजन युभेन्टसलाई २-० ले पराजित गरेको थियो ।