एजेन्सी – फ्रान्सेली क्लब पेरिस सेन्ट जर्मेन (पिएसजी)का उरुग्वेली फरवार्ड एडिन्सन काभानीले स्पेनिस क्लब एटलेटिको म्याड्रिडसँग खटपट परेपछि अर्को सिजन इटालियन सिरी ए मा खेल्ने भएका छन् ।

जनवरी ट्रान्सफर विन्डोमा एटलेटिको म्याड्रिड र काभानीबीच व्यक्तिगत सम्झौता भएपनि दुई क्लबबीच ट्रान्सफर रकमलाई लिएर समझदारी हुन नसक्दा ट्रान्सफर रोकिएको थियो । म्याड्रिड टोलीका अनुसार काभानीका दाजु र एजेन्टले छलफलका क्रममा गरेको व्यवहारले क्लब रुष्ट भएको थियो ।

एटलेटिकोका अध्यक्ष एन्रिके सेरेजोले सार्वजनिक रुपमा नै उनको एजेन्टको आलोचना गरेका थिए । ‘ काभानीको विषयमा जे भयो, एकदम नराम्रो भयो । हामी यहाँ उनको परिवारबाट लुटिन आएका हैनौं,’ सेरेजोले भने ।

यता काभानीका दाजुले भने एटलेटिकोको बुझाइ गलत रहेको दावी गरे । ‘पीएसजीको पनि केहि माग थियो । एटलेटिकोले त्यसलाई पूरा गर्न नमानेपछि पीएसजीले पनि पछाडी नहट्ने बतायो । दुवै क्लबबीच समझदारी हुन नसक्दा नै ट्रान्सफर सफल हुन सकेन,’ उनले भने ।

काभानीले पीएसजीमा झन्डै ७ वर्षको बसाईंपछि फेरी इटालियन लिग नै फर्कने सम्भावना बलियो देखिएको छ । उनलाई अनुबन्ध गर्न एएस रोमाले छलफल थालिसकेको छ । यसअघि काभानीले सन् २००२ देखि २०१३ सम्म इटालीमा खेलेका थिए । उनले सन् २००२ देखि पालेर्मोबाट खेल्दै सन् २०१० मा नेपोलीको जर्सी लगाएका थिए ।