एजेन्सी – स्पेनिस ला लिगा अन्तर्गत मंगलबारको खेलमा बार्सिलोना घरेलु मैदानमा एटलेटिको म्याड्रिडसँग २-२ को बराबरीमा रोकिएपछि शीर्षस्थानमा उक्लन सकेन ।

उपाधि लक्ष्यसाथ अगाडी बढेको बार्सिलोना लगातार दोस्रो खेलमा जित हासिल गर्न नसक्दा प्रशिक्षक किके सेटिन दबाबमा छन् । तर उनले पछिल्लो नतिजालाई लिएर आफ्नो बार्सिलोनासँगको भविष्यबारे कुनै डर नरहेको उनले बताएका छन् ।

‘मलाई आफ्नो भाविस्ज्यलाई लिएर कुनै डर छैन,’ उनले भने, ‘जित दर्ता गर्न नसक्नु खराब नतिजा हो । हामीले सोचेजस्तो खेल्न सकिरहेका छैनौं । हरेक खेलपछि चुनौती थपिएको छ ।’

‘हरेक खेलमा अंक गुमाउँदा हाम्रो उपाधि जित्ने लक्ष्य सफल हुन सक्दैन । यसो भन्दा हामीले मिहिनेत गर्न भने छोड्नुहुन्न । एटलेतिको राम्रो टोली हो, हामीले सक्दो प्रयास गरेका हौँ ।’

प्रशिक्षक सेटिनले विपक्षी टोलीका डिएगो सिमिओनीको रणनीतिमा परिवर्तन गर्न मिडफिल्डर रिकी पुजलाई पहिलो रोजाईमा खेलाएका थिए । पछिल्ला खेलमा बेन्चबाट आएर राम्रो प्रभाव जमाएपछि पुजले सुरुवाती रोजाईमा खेल्दै राम्रो प्रदर्शन गरे ।

‘ हामीले टोलीमा केहि परिवर्तन गरेका थियौं । त्यसले केहि हदसम्म टोलीलाई फाइदा पनि गरेको छ,’ सेटिनले भने, ‘एटलेटिकोले रक्षात्मक रुपमा राम्रो खेल्यो । हामीले खुलेर खेल्ने ठाउँ दिएन र पूरा समय डटेर खेल्यो ।’

एटलेटिकोसंग बराबरीमा अंक गुमाएपनि सेटिनले प्रदर्शनका आधारमा भने असन्तुष्ट रहने ठाउँ नरहेको बताए ।

‘म प्रदर्शनलाई लिएर खुसी नै छु । हामीले खेलमा अधिकांश समय नियन्त्रण बनाएका थियौं । जित दर्ता गर्न नसक्दा दुख भने लागेको छ,’ उनले भने, ‘ यस्ता टोलीसँग कहिलेकहीं जित्न सहज हुन्न । उनीहरु अनुशासित भएर आफ्नो योजनामा खेल्छन् । म आफ्नो टोलीको प्रदर्शनबाट सन्तुष्ट छु ।’