एजेन्सी – क्याटलान क्लब बार्सिलोनाका कप्तान लिओनेल मेस्सी आफ्नो पूर्व क्लब नेवेल्स ओल्ड ब्वाइज फर्कने सम्भावना असम्भव नरहेको अर्जेन्टिनी क्लबका उपाध्यक्ष क्रिस्टियन डी’अमिकोले बताएका छन् ।

अमिकोले टिएनटि स्पोर्ट्ससँग अन्तर्वार्ताका क्रममा मेस्सी क्लब फर्कने विषयमा चर्चा गर्दै खेलाडी आफैंले यस सम्भावनालाई नकार्न नसकेको बताए । उनले विगतमा म्याराडोनाको समेत उदाहरण प्रस्तुत गर्दै मेस्सी क्लब फर्कनेमा आफू आशावादी रहेको बताए ।

‘मलाई लाग्दैन की मेस्सीको पुनरागमन असम्भव छ,’ अमिकोले भने, ‘यो नितान्त मेस्सी र उनको परिवारले लिने निर्णय हो । हामीले उनलाई सहज रुपमा निर्णय लिने वातावरण बनाउने मात्र हो ।’

‘ इतिहास साक्षी छ, जब म्याराडोना नेवेल्स आएका थिए, कसैले पनि सोचेका थिएनन् की उनी एकदिन फर्कनेछन् । मलाई आशा छ की मेस्सीले पनि सोहि किसिमको निर्णय लिएर घर फर्कनेछन् ।’

‘मैले चर्चाका लागि मात्र बोलिरहेको छैन । यसबारे धेरै छलफल गर्न पनि सकिन्न,’ उनले भने, ‘जो पनि नेवेल्सको समर्थकले एकदिन मेस्सीलाई आफ्नो टोलीको जर्सीमा देख्न चाहन्छ । उनी विश्वका सर्वश्रेष्ठ खेलाडी हुन् । समयले हामीलाई कहाँ पुर्याउँछ भन्ने हेर्न धैर्यताका साथ बसेका छौं ।’

अर्जेन्टिनी राष्ट्रिय टोलीका पूर्व मिडफिल्डर तथा हाल नेवेल्सका खेलाडी म्याक्सी रोड्रीग्वेजले पनि आफ्नो धरान राखे । ‘मलाई आशा छ उनी यहाँ फर्केर आउनेछन् । समर्थकका लागि उनको पुनरागमन सपना जस्तै हुनेछ,’ म्याक्सीले भने ।

‘मेस्सीको यो निर्णयमा परिवारको पनि भूमिका हुन्छ । कतिपय अवस्थामा परिवारको कारण नै क्लब बदल्ने स्थिति नबन्न सक्छ । तर उनी फर्कने निर्णय गर्छन् भने उनले चाडैं गरेको हेर्न चाहन्छु । यसो हुँदा मात्र मैले उनीसँग खेल्न पाउँछु,’ लिभरपुल र एटलेटिको म्याड्रिडका पूर्व मिडफिल्डरले भने ।