एजेन्सी – इटालियन सिरी ‘ए’ मा इन्टर मिलानले सानदार जित निकालेको छ । घरेलु मैदानमा इन्टरले रेलिगेसन जोनमा रहेको ब्रेसियामाथि ६–० को फराकिलो जित निकालेको हो ।

मिलानोमा बुधबार राति भएको खेलमा इन्टर मिलानको फराकिलो जितमा एस्ले योङ, एलेक्सिस सान्चेज, डानिलो डि एम्ब्रोसियो, रोवर्टाे गाग्लियरडिनी, क्रिस्टियन इरिक्सन र एन्टेनियो क्यानड्रेभाले गोल गरे। एकपक्षीय बनेको खेलमा इन्टर मिलानले खेलको सुरुवातदेखि नै गोल गर्दा गोल गर्ने श्रृंखलालाई अन्तिमसम्म जारी राखेको थियो ।

पाँचौ मिनेटमा योङले गोल गर्दै इन्टर मिलानलाई खेलमा अघि बढाएका थिए । २०औं मिनेटमा सान्चेजले पेनाल्टीमार्फत अग्रता दोब्बर बनाएका थिए । पहिलो हाफको इन्ज्युरी समयमा डानिलोले गोल गरेपछि इन्टर मिलानले पहिलो हाफमा ३–० को आरामदायी अग्रता बनाउदा दोस्रो हाफमा पनि ३ गोल थप्न सफल भएको थियो ।

५२औं मिनेटमा रोबर्टाेले गोल गर्दै इन्टर मिलानलाई फराकिलो जिततर्फ अग्रसर गराए । खेल सकिन अन्तिम सात मिनेट बाँकी रहँदा इरिक्सन ८३ र एन्टेनियोले ८८औं मिनेटमा गोल गरेपछि इन्टरले ६–० को सानदार जित निकाल्यो ।

जितसँगै तेस्रो स्थानमा रहेको इन्टर मिलानको २९ खेलबाट ६४ अंक पुगेको छ । पराजित ब्रेसिया १८ अंक जोडेर पुछारमा यथावत छ ।

अन्य नतिजा

फियोरेन्टिनाविरुद्ध सासुलो (१–३)

हेलास भेरोनाविरुद्ध पर्मा (३–२)

लिसविरुद्ध साम्पडोरिया (१–२)

एसपालविरुद्ध एसी मिलान (२–२)